Malapasong drayber sa Talisay ikiha

CEBU, Philippines - Gipanglantawan sa traffic consultant sa Siyudad sa Talisay nga sa umaabot nga mga buwan magdasok sa buhatan sa City of Talisay-Traffic Operation Development Authority (CT-TODA) ang mga drayber nga naisyuhan og citation ticket.

Kini nunot sa ilang ipasaka nga kaso batok sa mga drayber nga dili motagad sa citation tickets. Si retired fiscal Oscar Capacio niingon nga lisud sa pagkakaron nga makakuha og Temporary Operator’s Permit (TOP) tungod sa kaistrikto sa Land Transportation Office (LTO) sa paghatag niini.

Kasagaran sa mga drayber mobaliwala lang sa citation ticket tungod kay gamay ra ang ilang bayranan nga multa.

Si Capacio nibutyag nga kun maduso na nila ang kaso ngadto sa korte diha na unya magkisi-kisi ang mga drayber aron tagdon nila ang citation ticket nga naisyu kanila.

“Inig lusot ana sa warrant diha nana sila magkabuang og hangyo,” nagkanayon si Capacio.

Dugang pa niya nga maabot ra unya ang panahon nga mahisama ang buhatan sa CT-TODA sa buhatan sa traffic sa Siyudad sa Sugbo nga gidagsa sa mga drayber aron manghangyo. (BANAT NEWS)