Architect giilad, 3 gidakop

CEBU, Philippines - Tulo ka tawo nga naghimo og online selling sa mga laptop, gisikop sa kapolisan human gireklamo sa usa ka architect og pagpangilad.

Nagbase sa Lunsgod sa Consolacion ang maong mga online seller samtang ang nireklamong architect taga Dakbayan sa Ormoc diin wala gyud maabot kaniya ang iyang gi-order bisan og nakabayad na siya.

Ang mga  dinakpan giila ni PO1 Peter Santillan sa Consolacion Police Station nga sila si Roger Agustin, Junril Paanod, Ralfh Jordan ug ang pabiling gawasnon nga si Lanch Gerald Ravina. Matud ni PO1 Santillan nga ang biktima nga si Arch.  Joseph Zapata, ni-order pinaagi sa online sa gibaligyang mga laptop sa mga suspetsado. Nagpadala kini og mensahe bahin sa iyang pagpalit sa mga laptop nga nagkantidad og P30mil.

Gipadala ni Zapata ang kuwarta pinaagi sa money remittance center niadtong Pebrero 6 diin si Paanod maoy nikuha niini.

Nilabay na lang ang kapin usa ka semana, walay laptop nga naabot kaniya, hinungdan nga siya milarga paingon dinhi sa Sugbo ug midangop sa kapolisan sa Consolacion.

Dugang ni PO1 Santillan nga ilang gihimo ang hot pursuit operation batok sa mga suspetsado apan si Ravina, wala atol sa ilang operasyon maong wala kini malakip sa pagsikop. Ang tulo nga nadakpan, nagtingkagol na karon sulod sa selda samtang nagpaabot nga pasakaan og tukmang kaso. (BANAT NEWS)