May kakulian sa pangisip gipusil

CEBU, Philippines - Giingong adunay kakulian sa pangisip ug pirmeng magbinastos sa kababayen-an, usa ka lalaki nga nitambong og disko ang napalgang patay ug may samad pinusilan sa lawas sa Kawit, Lungsod sa Medellin.

Ang 40-anyos nga si Roldan Rosos nitambong pa og disko sa Sitio Tambo alas 10:30 sa gabii niadtong Domingo.

Gituohang gipusil ka lima ang biktima base sa mga samad sa wala pa nasuta nga kalibre sa pusil.

Matud ni PO1 Antonio Reyco, desk officer sa Medellin Police Station, nga walay kaaway ang biktima.

Gani sa wala pa ang disko, matud ni Reyco nga giingnan na si Rosos nga dili magpabadlong. (BANAT NEWS)