Mga MSMEs hatagan og suporta sa gobiyerno

CEBU, Philippines — Kapin 500,000 ka micro, small, ug medium enterprises (MSMEs) sa Pilipinas ang target nga makadawat og suporta gikan sa gobyerno ubos sa gisugyot nga 2027 national budget.

Matud sa Department of Budget and Management (DBM), P2.412 bilyon ang gisugyot alang sa MSME Development Program sa Department of Trade and Industry (DTI) aron matabangan ang 501,253 ka MSMEs nga mapalambo ang ilang produksiyon, mapalig-on ang negosyo, ug mas mapalapad ang merkado.

Sa maong pondo, P937.397 milyon ang igahin sa mga locally funded projects, lakip ang P472.468 milyon alang sa pagtukod og operasyon sa Negosyo Centers nga naghatag og tabang sa business registration, advisory services, product development, trade promotion, ug financing.

Laing P464.929 milyon ang gisugyot alang sa Shared Service Facilities Project aron mahatagan ang mga MSMEs og access sa makinarya, kagamitan, teknolohiya, ug uban pang pasilidad nga lisod o mahal paliton sa gagmay nga negosyo.

Giapil usab sa budget ang P288.520 milyon alang sa Rural Agro-Enterprise Partnership for Inclusive Development and Growth Project, nga nagtumong sa pagsuporta sa mga rural enterprise ug pagkonektar sa gagmay nga prodyuser sa mas lig-on nga value chains.

Samtang, P840.170 milyon ang gisugyot alang sa Pondo sa Pagbabago at Pag-Asenso Program sa Small Business Corporation, nga gilauman makahatag og mas barato nga financing sa labing menos 40,000 ka MSME borrowers.

Sa kinatibuk-an, target sa DTI nga matabangan ang 501,253 ka MSMEs ug mahatagan og serbisyo ang 1.065 milyon ka kliyente pinaagi sa mga Negosyo Center sa tibuok nasod sa 2027. (BANAT NEWS)