Mga suroyanan, simbahan gibantayan sa kapolisan

CEBU, Philippines — Mga suroyanan sa mga tawo karong adlawa, Pebrero 14, 2024 atol sa adlaw sa kasing-kasing  ug Miyerkules Badlis hugot nga bantayan sa kapolisan sa rehiyon.

Si Police Lieutenant Colonel Gerard Ace Pelare, tigpamaba ni Police Regional Office-7 Director Brigadier General Anthony Aberin nagkanayon ang kapulisan naghimo og security plan para niing duha ka okasyon  sanglit gilauman ang mga tawo manggawas ug moadto sa mga dapit nga tapukanan og daghang tawo.

"Usa ni priority pud sa atoang Police Regional Office-7. Ang atong station commanders, mga municipal police station chiefs naghimo na og ilahang adjustment sa security para ma cater both the ash Wednesday and of course the Valentine's Day," ni Pelare pa.

Gitimaan sab karong adlawa pagbukas sa Lenten Season pinaagi sa Ash Wednesday o Miyerkules sa Badlis sa tibuok Simbahan nga Katoliko.

Atol sa Miyerkules sa Badlis gipahinumduman ang mga magtutuo nga opisyal na sab ang pagsugod sa pagpuasa o fasting and abstinence obligations sa mga Romano Katoliko.

Mahimo lang makakaon og usa ka one full meal kung gustohon ug walay karne kada adlaw hangtud sa pagtapos sa Semana Santa.

Lakip usab sa buhaton karon ang pagpaambit sa buhat sa kalooy paghatag ilabi na ngadto sa mga gigutom ug walay gikaon.

Samtang subling nagpahinumdom ang kapulisan batok aning love scammers ning pagsaulog sa Valentine's Day. 

"You must be able to be very circumspect about it, tan-awa pag-ayo ilabi na og mangayo og any amount, in any forms," ni Pelare pa.

Nagpahinumdom sab ang kapulisan nga dunay balaod may labot sa mga menor de edad nga mosulod aning mga motels, hotels ug lodging houses.

Apelar nila sa business establishments nga magmatngon ug kun dunay mo check in mangayo gyud og identification card ug i-validate kung nagsulti sa tinuod ilabi na sa edad.

Sa laing bahin, si Talisay City Councilor Gail Restauro mipahimangno sa mga Talisaynon nga mag-amping  sa ilang pagsuroy karong alawa.

Si Restauro nga chairman sa Committee on Peace and Order nihangyo sa mga polis nga bantayan ang mga suroyanan ilabi na kadtong dunay mga parte nga ngitngit tungod kay posibleng adunay mopahimulos sa higayon.— IBM BANAT NEWS