Notadong tulisan nasakmitan og armas sa mga polis

CEBU, Philippines — Nadakpan ang usa ka notadong tulisan human kini nakuhaan og armas diha sa Sitio Mananga 2, Barangay Tabunok, Dakbayan sa Talisay kagahapon sa buntag.

Ang nasikop mao si Jubell Conde Banguisio, 22-anyos, nagpuyo sa nahisgutang dapit.

Si Police Lieutenant Colonel Wayne Magbanua, hepe sa kapolisan sa Dakbayan sa Talisay nagkanayon nga ang iyang  mga sakop niresponde sa tawag kalabot sa armadong tawo diha sa nahisgutang lugar kinsa si Banguisio ang naabtan sa kapolisan nga naghupot og armas.

Si Banguisio Gipangitaan sa mga polis og dokumento sa gidala niining armas apan ang suspetsado walay napakita hinungdan nga gidakop kini sa mga polis.

Nasakmit sa mga polis gikan kang Banguisio ang usa ka kalibre .22 nga revolver nga adunay tulo ka buhing bala.

Matud ni Magbanua nga notado nga tulisan ang suspetsado diin kaduha na kini nadakpan ug nabilanggo.

Gisusi usab karon sa kapolisan kong si Banguisio ang responsable sa pipila ka insidente tulis nga nahitabo sa Dakbayan sa  Talisay. — BDB (BANATNEWS)