Reklamo bahin sa vote buying tubagon sa kapolisan

CEBU, Philippines — Magbutang og booth o lamesa ang kapolisan sa Dakbayan sa Talisay aron sa pagtubag sa mga alegasyon labot sa vote buying.

Kini maoy usa sa mga pagpangandam nga gihimo nila ni Police Lt. Col. Wayne Magbanua, hepe sa kapolisan sa Talisay.

Matud pa niya nga way lain nga tubagon ang polis nga iyang ibutang sa booth kundili mao ang alegasyon sa pagpamalit og botos.

Nagkanayon si Magbanua nga syento por syento na sila nga andam sa paghatag og seguridad sa pagpangampanya hangtud na sa adlaw sa piniliay. Ang gipang augment nga mga polis sa Talisay atol sa kapistahan molahos na kini sa piniliay ug sa kalag-kalag.

Samtang hugot nga pagpangandam alang sa nagsingabot nga Barangay ug Sangguniang Kabataan Elections ang gihimo usab sa kagamhanan sa siyudad sa Mandaue.

Subay niini ang Mandaue City Disaster Risk Reduction and Management Office (CDRRMO) nagtigum niadtong Martes Oktubre 17, 2023 aron hisgutan ang ilang mga lakang sa paghatag og dinaliang panginahanglan sa Barangay ug Sangguniang Kabataan Election (BSKE)      2023.

Si Buddy Alain Ybañez nga maoy pangulo sa CDRRMO miingon nga nakig-alayon na sila sa Traffic Enforcement Agency of Mandaue (TEAM), Commission on Elections, kapolisan sa Mandaue City Police Office (MCPO) ug Bureau of Fire Protection.

Sa pikas bahin giawhag usab sa Commission on Elections ang mga kandidato nga mangampanya nga dili magpataka og pamutang sa ilang mga campaign materials ilabi na diha sa mga punoan sa kahoy.

Matud pa ni Commission on Election Central Visayas Administrative Officer Ivan Jason Delos Santos nga angay lang tan-awon sa mga magpapili ug sa ilang supporter nga dili sila makahatag og kadaut sa kalikopan.

Giawhag usab ni Delos Santos ang mga kandidato nga human sa adlaw sa eleksyon mas maayo tabangan usab nila ang local nga kagamhanan sa pagpanghipos sa ilang mga campaign materials. — Romeo T. Limpangog, Rowena D. Capistrano (BANAT NEWS)