CCMC butangan og kidney cancer center

CEBU, Philippines — Gibutyag ni Mayor Michael Rama nga sa higayon nga mahuman na ang construction sa tibuok building sa Cebu City Medical Center pabutangan niya kini og  kidney cancer center nga kabahin sa iyang misyon alang sa pagtabang sa mga nanginahanglan.

Nahisgotan kini ni Rama atol sa pagtambong niya sa  selebrasyon sa dakbayan sa  Kidney Month nga gipahigayon diha sa  Il Corso Lifemalls sa  South Road Properties sa niaging adlaw.

Base sa taho sa Cebu City Public Information Office gipaniguro ni Rama nga ang kahumanan sa CCMC nga gihulagway niya nga tambalanan alang sa mga kabus apan pang-adunahan ang kalidad sa matang sa serbisyo nga ihatag niini.

Sayo pa, gibutyag ni Rama nga kinahanglan nga aduna gyu’y mga gitagana nga lain-laing pasilidad ang maong tambalanan aron siguradong maatiman ang mga pasyente.

Mohaom usab kini sa iyang pangandoy nga maghatag og lapad o dekalidad nga health care services ngadto sa mga Sugbuanon ilabi na sa mga kabus.

Niadtong Disyembre 2, 2022 gihimo usab ang ground breaking sa gilaoman nga labing dako nga  cleft care center sa tibouk kalibutan nga ipahimutang diha sa ika-unom nga andana sa Cebu City Medical Center.

Gilusad kini sa Operation Smile Philippines (OSP) kauban ang Marquita Salimbangon Yeung Foundation Inc. ug ang maong pasilidad tawagon og "The Cebu

Comprehensive Cleft Care Center of Excellence".

Nasayran nga ang maong andana adunay gilapdon nga 1,700 square meters.

Gawas sa bag-ong building sa CCMC gitan-aw usab ni Rama ang pagtukod og medical arts ilawom sa kanhi CCMC building diha sa atbang lang sa bag-ong building. — BDB (BANAT NEWS)