Hitman napusilan sa off-duty nga polis

CEBU, Philippines — Usa ka gidudahang hitman ang napusilan patay sa off-duty nga polis human gyud niini gipusil ang gituohang “target” diha sa Barangay Luyang, San Remegio, tungang gabii niadtong  adlaw nga Martes, Mayo 24,2022.

Ang mga suspetsado nga napatay giila nga si Maralas Marianito,54, giingong notado nga hitman samtang nakaikyas unta ang iyang lookout driver nga si Rowen dela Peña Cose, 29, apan nadakpan sa hot pursuit operation.

Lt. Colonel Florendo Fajardo sa Bogo Police Station miila sa iyang sakop nga si Police Corporal Laong Laang Toring nga off-duty na ug nakigbilar sa namatyan sa maong lugar anang hitaboa apan miresponde sa nahitabong pagpamusil.  “It’s so happen nga there is a shooting incident sa pagbilar niya, and didto padulong ang usa ka biktima duol gyud sa iyang atubangan sa ilang gibilaran,” matud ni Fajardo.

Ang target nga biktimahon unta sa suspek nagsakay og motor  giila nga si Franlin Sayson, 48, taga Brgy. Estaca sa Lungsod sa Compostela.

Si Sayson gikatahong kalit nga nihunong atubangan sa haya diin nagbilar si Toring.  Matud pa, paghunong ni Sayson gipusil kini dayon sa nagsunod nga silang Marianito nga luwan sa motorsiklong gimaneho ni Cose.  Napatay si Sayson. “Siyempre in defense of a stranger, ni-react siya (Toring) ug iyahang gi engaged ang gunman na wa pud mag expect nga naay police didto,” sigon ni Fajardo.

Si Cose kinsa nasamdan sab human napusilan ni Toring sa sampot daling misibat apan nadakpan gihapon sa mga polis sa silingang barangay.  Sa pag-abot sa SOCO  una pa nailhan si Marianito. Nahibaw-an nga paryente kini sa asawa ni Toring. Wala dayon kini mailhi atol sa pagpusil kay nagtaptap kini sa nawong.

Matud ni Fajardo si Marianito anaa sa drug watchlist  ug gidudahan nga hitman.  “Murag gun-for-hire pud siya,”matud ni Fajardo.

Si Cose gikatahong mitug-an sa kapolisan nga ang nagsugo nila sa pagpatay kang Sayson mao ang usa ka babaye ginganlan nga ‘Boy’ kinsa naa sab nagbilar niadtong tungora diin nahitabo ang insidente. Gipalawman pa sa kapolisan ang imbestigasyon bahin niini.

Si Fajardo mipasidungog kang Toring tungod sa paspas niini nga reaksyon sa maong sitwasyon.— IBM (BANATNEWS)