Larsian rehab sugdan na

CEBU, Philippines – Gipaabot nga sa hinapos niining buwan sa Mayo masugdan na ang rehabilitasyon sa Larsian Barbeque.

Kini human gihatagan na og pagtugot sa Provincial Board si Gobernador Hilario Davide III nga mopirma og kasabutan tali sa nidaug nga kontraktor nga maoy motrabaho sa Larsian.

Ang GTM Builders and Supply maoy winning bidder sa kantidad nga P1.8 milyones atol sa bidding sa maong proyekto.

Matud ni Joey Herrera, administrator sa Larsian Barbeque, nga tinguha nila nga sa dili pa mahuman ang buwan sa Mayo o sa unang adlaw sa Hunyo, temporaryong mapasirad-an ang Larsian sulod sa duha ka buwan nga ipaubos kini sa rehabilitasyon.

Si Herrera nagkanayon nga ila sab han-ayon ang mga ipatuman nga kabag-ohan sa Larsian sama sa kalimpyo ug presyo sa mga baligya sanglit mao kini ang kasagaran nga reklamo sa mga kustomer.

Matud ni Herrera nga sulod sab sa duha ka buwan ipaubos sa training ang mga stall owners ug trabahante niini sama sa customer service ug sanitation. Ang dili moapil dili sab pabalikon sa pagbaligya sa Larsian, matud ni Herrera. (/GMR)(BANAT NEWS)