Hubog nasukmagan patay

CEBU, Philippines — Patay ang usa ka hubog kinsa giingong nagmaoy diha sulod sa diskohan human kini sukmaga sa lalake nga iyang gitamparos niadtong Domingo sa kadlawon diha sa Barangay Poblacion, Bonbon, dakbayan sa Sugbo.

Giingong napantok ang ulo sa biktima diha sa sawog sa diskohan dihang natumba kini human masukmagi.

Ang biktima giila nga si Dexter Bacalso, 32, residente sa maong dapit ug ang giingong nakasumbag niini mao si Glenn Ebarle, 27, residente usab sa maong lugar.

Si SPO1 Winston Ybañez kinsa maoy nipahigayon sa imbestigasyon sa hitabo mibutyag nga sa wala pa mahitabo ang insidente si Ebarle diha sulod sa diskohan uban sa iyang mga ig-agaw ug laing upat ka higala. Giingong si Bacalso kinsa hubog niadtong higayona kalit nga miduol ug sa wala’y igong rason gitamparos si Ebarle.

Ug giingong gihan-an usab og bunal og botelya ni Bacalso si Ebarle hinungdan nga gisukmag siya niini. Maayong pagkaigo ni Bacalso sa baba sa kinumo ni Ebarle nga maoy hinungdan sa iyang pagkatumba ug pagkapantok sa ulo diha sa sawog sa diskohan.

Si Bacalso daling gidala ngadto sa Vicente Sotto Memorial Medical Center ug nianang pagkahapon sa nahisgutang adlaw nakabsan gyud kini sa kinabuhi.

Si Ebarle nasikop sa kapolisan ug nagtingkagol karon diha sa detention cell sa Cebu City Police Office (CCPO) ug gikatakdang pasakaan og tukmang kaso sa nahimo niyang kalapasan. -/BDB (BANAT NEWS)