PDEA-7 director ibalhin sa BOC?

CEBU, Philippines — Aduna karoy mikatap nga impormasyon nga ibalhin na si Philippine Drug Enforcement Agency Region-7 Regional Director Yogi Felimon Ruiz gawas sa rehiyon.

Sumala pa sa nanggawas nga impormasyon, ang bag-ong director sa PDEA nga si Isidro Lapeña gikatakda na usab nga ibalhin og laing pwesto. Si Lapeña gi-appoint nga mohulip sa kontrobersyal nga hepe sa Bureau of Customs nga si Nicanor Faeldon human kini makadesider nga mo-resign.

Gikatakdang molingkod isip puli sa gibiyaang pwesto ni Lapeña sa PDEA si  Police Chief Superintendent Aaron Aquino karong Septiyembre 12 tuig 2017.

Wala pa matino kon duna bay mahitabong reshuffling sa tanang regional directors sa PDEA kon molingkod na si Aquino apan butyag ni Ruiz nga andam siya.

“We are trained to follow orders and reshuffling and reassignments are part and parcel of our job as law enforcers. But the important thing is at the end of the day we are taking drugs off the streets for the future of our children wherever we are assigned,” si Ruiz nagkanayon.

Usa sa giingong posibleng balhinan kang Ruiz mao ang BOC aron maoy mangulo sa usa ka departamento didto.

Si Lapeña gisuwayan pagkuha og habig kagahapon pinaagi sa telepono apan pakyas ang maong tinguha.  - /IBM) (BANAT NEWS)