Gipusasan gipatay sa reclamation
CEBU, Philippines - Usa ka patay’ng lawas sa lalaki nga gituohang gi-salvage ang napalgan kilid sa Zuellig Avenue, Subangdaku, North Reclamation Area, Dakbayan sa Mandaue kagahapon sa kadlawon.
Nagkanayon si Senior Police Officer 2 Remegio Arciaga sa Mandaue City Police Office-Subangdaku Police Station nga nakapusas pa ang patay’ng lawas dihang nakit-an sa usa ka guwardiya kinsa maoy ni-report kanila pasado ala una sa kadlawon.
Matud ni Arciaga nga ang security guard nga si Joel Senados sa Tactical Security Agency nga na-assign sa usa ka pribadong logistics company nakadungog og buto gikan sa usa ka pusil ug iya dayon kining gisusi.
Dihang naabot siya sa dalan sa Zuellig iya nakit-an ang nagbuy-od nga lawas sa lalaki nga wala nay kinabuhi ug dunay samad pinusilan sa ulo.
Matud ni Arciaga nga ang patay’ng lawas nagsul-ob og stripe nga senina nga dunay kombinasyon sa kolor nga itom ug blue ug nagsul-ob og cargo pants samtang nakapusas.
Narekober sa polis ang usa ka empty shell nga gituohang gikan sa .45 caliber pistol.
Susihon sa polis ang closed-circuit television camera sa Mandaue City command center aron sa posibleng pag-ila sa nagdala sa patay’ng lawas sa gihisgutang dapit. Gidala sa St. Francis Funeral Homes sa Dakbayan sa Sugbo ang patay’ng lawas.
Si Senior Police Officer 1 Michael Limalima sa Presinto 2 sa MCPO nibana-bana nga anaa sa 20 ngadto sa 30-anyos ang panuigon sa biktima ug may lima ka tiil ang gitas-on. (BANAT NEWS)
- Latest
