Tulo ka sinaligan ni JVR mag-konsehal

CEBU, Philippines - Mopapili sa pagka-konsehal sa dakbayan a Talisay ang tulo ka opisyal nga anaa sa administrasyon ni Mayor Johnny V. de los Reyes kinsa naghupot og bug-at nga posisyon.

Kini mao sila si Vince Monterde, kinsa pangulo sa City Disaster Risk Reduction and Management Office (CDRRMO) ug kanhi magsusuwat sa pamantalaan; Atty. Alfredo Sipalay nga mao’y City Legal Officer ug ang gihugon-hugon nga si Pastor Solomon Paypa nga mao’y executive secretary ug public information officer (PIO).

Si Sipalay nikompirmar nga modagan pagka-konsehal ug para niya, ang iya’ng labing bintaha mao ang iya’ng pagka-abogado. Siya nagkanayon nga ang trabaho sa konsehal mao ang pagpanday og balaud ug kay siya usa ka abogado anad na sa gimbuhaton.

Sa iya’ng bahin si Monterde niingon nga ang iya’ng pagkasuod sa mga tawo ug mga opisyal sa barangay gumikan sa iya’ng trabaho mao'y iya’ng gituohang bintaha.

Si Paypa ang aktibo usab sa kalihukan sa siyudad. Ang tulo posible’ng molinya sa grupo ni JVR ug ni Konsehal Val Ylanan nga mao’y posible niya’ng running mate.

Nadungog nga moatbang ni JVR mao ang kasamtangang Bise Mayor nga si Atty. Romeo Villarante ug ang iya’ng running mate si Konsehal Danny Caballero. Usa sa segurado nila’ng kauban si Konsehal Aldin Diaz.

Matud ni Villarante nga unya na lang siya mopahibawo sa ubang kauban sa kahadlok nga kamangon sa laing partido. Sa ila’ng bahin, ang Alayon Party nga pinangulohan ni kanhi kongresista Eduardo Gullas ug kanhi bise mayor Alan Bucao ang mag-uban pagbalik.

Ila’ng line-up sila si Konsehal Antonio "Jojo" Bacaltos; Socrates Fernandez; Doroteo Emit ug Richard Francis "Choy" Aznar. Nangita pa sab sila og laing tawo nga mokompleto sa grupo. (BANAT NEWS)