Sikyu gidakop, armas niboto

CEBU, Philippines – Naangol ang habal-habal drayber dihang kalit lang niboto ang kargadang armas sa guwardiya nga nadestino sa pagbantay sa RD Pawnshop sa Poblacion Oriental, Consolacion alas 6 pasado ang takna sa niaging Sabado sa gabii.

Ang biktima mao si Richard Lungakit Saluna, 29, ulitawo nga taga barangay Tayud sa maong lungsod samtang ang guwardiya nga nakaingon sa pagka-angol mao si Junel Argoncillo,18-anyos, taga Poblacion, Sogod.

Si PO1 Socrates Borinaga sa Consolacion Police Station miingon nga nagmaneho sa iyang habal-habal ang biktima gikan naghatud og pasahero ug sa iyang paglabay balik sa Poblacion Oriental sa pagkuha na sab og laing pasahero kalit lang nabati ang lanug sa boto sa armas. Maoy namatngonan sa biktima ang pag-agas sa dugo gikan sa iyang simod ug sa iyang paghikap nakabaton na kini og samad pinusilan.

Matud ni PO1 Borinaga nga dali nga nangayo og panabang ang biktima sa ilang buhatan ug sa pakisusi nga ilang gihimo ilang nasuta nga aksidente nga niboto ang kargadang armas ni Argoncillo. Dugang pa ni PO1 Borinaga nga si Argoncillo nga ilang gisukitsukit mitug-an nga wala gyud tuyoa ang kalit nga pagboto sa armas igo sa semento ug nibanda ngadto sa biktima kinsa atol nga niagi sa maong dapit.

Dali nga gidala sa Eversely Child Sanitarium Hospital ang biktima ug ang guwardiya temporaryo’ng nagtingkagol sa detention cell sa kapolisan. – /GMR) (BANAT NEWS)