Lumod nabanlas baybayon sa Talisay
CEBU, Philippines - Usa ka patay nga Pygmy Killer Whale nga dunay gitas-on nga 2.6 meter ang nadagsa sa baybayon sa Sitio Aromahan, Barangay Dumlog, dakbayan sa Talisay niadtong Miyerkules sa gabii.
Si Talisay City councilor Antonio Bacaltos, Jr., chairman sa committee on environment mibutyag sa Banat News kagahapon nga ang maong lumod duna kini mga samad sa lawas dihang napalgan ni Aldrin Castillo, 24, nga mipahibalo dayon sa Fishermen Sea and Ecological Care (FISECA).
Ang maong lumod nga kabang ang kolor nga puti ug itom gidala sa mga sakop sa FISECA sa ilang buhatan sa Barangay Cansojong diin kini gisusi sa mga sakop sa Bureau of Fisheries and Aquatic Resources (BFAR). Nagduda ang BFAR-7 nga nadagsa kini tungod sa bagyong Glenda gumikan sa kadagko sa bawod ug nabunal kini sa mga bato. Mikuha og specimen ang BFAR sa maong lumod una pa kini gilubong. (BANAT NEWS)
- Latest
