Plastic ban gitinguha sa Lapu-Lapu City

CEBU, Philippines - Kinahanglan ang usa ka ordinansa nga magdili sa mga malls ug supermarkets nga mogamit og plastic bags aron malikayan na ang sigeng pagkabara sa mga kanal ug estero panahon nga ting-uwan sa siyudad sa Lapu-Lapu matud pang Mayor Paz Radaza.

Si Radaza mihimo sa maong pamahayag base sa assessment sa Department of Interior and Local Government nga nag-ingong wa makapasar ang siyudad kun disaster preparedness ilabi na sa kampanya kontra baha ang hisgutan.

Ang tsirman sa committee on environment nga si Konsehal Johnrey Gestopa magpanday na og usa ka ordinansa nga mag-ban sa plastic bags sa mga malls ug supermarkets.

Gihimong sanglitanan ni Radaza ang gihimo sa mga malls sa dakbayan sa Sugbo nga dunay duha ka adlaw nga dili mogamit og plastic bag ang maong mga tindahan.

Giawhag usab niya karon ang mga malls ug supermarkets sa Lapu-Lapu nga bulsita ug dili plastic bags ang iputos sa ilang mga baligya.

Miangkon si Radaza nga daghan pa sa mga residente ang wala pa gyud maleksiyon nga ang pagbara sa mga kanal mugna kini sa mga basura nga plastik.

Buot niya karon nga pangunayan sa barangay officials ang pag-monitor ug pag-edukar sa ilang mga molupyo paglimpyo sa ilang mga tugkaran. (BANAT NEWS)