Manhunt vs sikyu nga nanulis ug mipatay og tulo gipalapdan

CEBU, Philippines - Gihimo nang regionwide ang manhunt operation batok sa security guard nga miunay pagpusil patay sa iyang mga kauban sa gibantayang bangko ug mikawat sa kwarta sa vault niini diha sa lungsod sa Daanbantayan niadtong bisperas sa Bag-ong Tuig.

Ang suspek nga si Berly Tudtod, taga-Barangay Dakit, Bogo City, migamit sa iyang service firearm nga 12 -gauge shotgun sa pagpusil sa kaubang security guard nga si Dean Deserto ug sa live-in partner niini nga si Cecilia Torre.

Giapil pagpusil ni Tudtod si Jenelyn Megabon, ang accounting clerk sa Fair Bank nga taga Medellin nga nag-overtime niadtong tungora alang sa year end reports sa ilang buhatan.

Si Tudtod ug Deserto pulos sakop sa Ricarte Security Agency nga nahimutang sa Barangay East Poblacion, Naga City. Ang duha kauban isip nightshift security guards sa maong bangko.

Pulos samad pinusilan gamit ang shotgun ang nahiaguman sa mga biktima buntag na dihang nadiskubrehan sa incoming security guard nga si Bernardo Veraque.

Ang Provincial Director sa Cebu Provincial Police Office, Sr. Supt. Noel Gillamac miingon nga nakig-alayon na siya sa tanang buhatan sa kapolisan sa rehiyon aron masikop ang maong suspetsado.

Apan base sa nakuha nilang impormasyon, wala na dinhi sa Sugbu ang suspek.

“Possible naa ni siya sa iyang mga kabanay but we are tracking him,” matud pa ni Gillamac.

Si Gillamac nagkanayon nga posibleng dunay pagdumot ang suspek sa iyang gitrabahoang bangko ug sa kaubanan diha sa maong establisamento.

“There were reports nga sige ni siya og ka-late sa trabaho unya ang tigsumbong kuno sa agency kining iyang kauban (Deserto),” sumala pang Gillamac.

Kasong robbery with multiple homicides ang giandam sa kapolisan batok sa suspek nga posibleng ipasaka ngadto sa piskalya sa mosunod nga mga adlaw.

Ang Daanbantayan police makaduha naipsotan sa suspek nga si Tudtud dihang giadto ang mga lugar nga iyang giadtoan.

Unang giadto sa kapolisan ang balay ni Tudtud sa barangay Dakit sa dakbayan sa Bogo apan nakalakaw na kini.

Matud pa sa inahan sa suspek nga si Lolita  nga nahinabi sa kapolisan, niabot kini sa ilang balay sa alas 8:00 sa gabii sa bisperas sa Bag-ong Tuig apan milakaw ra pud kini dayon gibanabanang alas-onse sa gabii.

Nahitabo ang pagpamusil gibanabanang alas-onse pasado na sa gabii sa mao gihapong petsa.

Sumala pa sa nakuhang impormasyon sa kapolisan, mibalik sa balay sa inahan si Berly alas- 4  na sa kaadlawon  kuyog niini ang iyang asawa nga si Christine apan nanglakaw dayon ang duha padulong sa barangay Cayang sa dakbayan sa Bogo.

Gisuwayan pag-apas sa kapolisan ang suspek sa Cayang apan ang asawa na lang ang ilang naabtan kay milarga na kuno kini padung sa Cebu City aron mangaplay og trabaho. (/EIM)(BANAT NEWS)