3 ka lalaking nagsuyop og drugas sikop
CEBU, Philippines - Tulo ka mga lalaki kinsa giingong gikan nga nagsuyop og ginadiling drugas ang nasikop sa mga polis didto sa sitio Hawod, barangay Bulacao, dakbayan sa Talisay sa miaging kaadlawon.
Ang mga suspetsado giila sa mga polis nga sila si Joy Pacaña, 27, taga barangay Tugas, Pardo, dakbayan sa Sugbo, Benjie Soden, 35, taga sitio Tubod, barangay Candulawan, dakbayan sa Talisay ug Jay Monterde, 27, taga barangay Candulawan, Talisay. Naimbargo sa mga polis gikan ni Pacaña ang usa ka kalibre .45 nga pistola nga may unom ka mga buhing bala ug shabu paraphernalia.
Ang XRM nga motorsiklo nga nagtangag sa plakang 7224-YD nga gimaneho ni Soden gi-impound sa mga polis human ang naulahi napakyas sa pagpakita og driver’s license lakip na sa OR ug CR sa motorsiklo.
Ang mga polis giingong nakasakmit og tulo ka paketeng shabu gikan ni Soden.
Si Senior Inspector Al Pascual nga nangulo sa grupong misikop sa mga suspetsado mibutyag sa Banat News nga usa ka residente sa nahisgutang lugar ang nanawag sa ilang buhatan ug misumbong bahin sa tulo ka mga armadong lalaki nga nagsakay sa nahisgutang motorsiklo.
Si Pascual uban nila ni Senior Inspector Wilson Abot, SPO1 Mikie Espina, PO3 Oliver Ortega, PO2 Narciso Alforque, PO1 Stephen Sefuesca, PO1 Edwin Campomanes, PO1 Ethrol Gamboa, PO1 Edwin Magcacuas, PO1 Raul Wamar Jr. ug PO1 John Mark Asendiente miresponde sa maong alarma.
Matud ni Pascual nga naabtan nila ang mga suspetsado nga migawas gikan sa lugar ug dihang gipaisa nila ang t-shirt ni Pacaña nakita ang nahisgutang pusil ug drug paraphernalia.
Si Pascual midugang nga nakadawat sila og report nga ang tulo giingong gikan kini nagsuyop og shabu sa maong lugar.
Ang mga suspetsado kinsa nagtingkagol sa Talisay City detention cell gitakdang pasakaan og kasong paghupot og armas nga walay lisensiya, paghupot og ginadiling drugas ug kalapasan sa balaod sa trapiko tungod sa pagmaneho ni Soden nga walay lisensiya ug walay dokumento sa motorsiklo niining gimaneho. (/WC) (BANAT NEWS)
- Latest
