Ginang gipatay atubangan sa bana
CEBU, Philippines - Patay ang usa ka ginang human kini gipaulanan og bala atubangan mismo sa iyang bana diha sa sitio Luan-luan sa Poblacion Uno sa siyudad sa Carcar sa miaging gabii.
Base sa report sa Cebu Provincial Police Office, Operations Branch, ang biktima giilang si Ayonie Lapinoria Geraldizo, 35-anyos, residente sa maong dapit.
Matud pa sa imbestigasyon sa Carcar City Police Station ang biktima ug ang iyang bana nga si Oliver Geraldizo nagbarog-barog sa daplin sa dalan niadtong tungora dihang kalit nga gihunongan sa usa ka motorsiklo nga ang mga sakay nagsuot og ski mask ug diretsong namusil sa biktima.
Ang biktima nakaangkon og daghang mga samad pinusilan sa iyang kalawasan ug wala na makaabot nga buhi sa pag-abot sa Carcar District Hospital.
Ang wala pa mailhing mga lalaki daling miikyas padung sa direksyon sa Sitio Dapdap sa Poblacion 3 sa mao gihapong siyudad.
Upat ka basiyo sa bala sa kalibre .45 pistola ug duha ka slugs ang nakuha sa mga imbestigador diha sa crime scene ug padayon pang gisubay sa kapolisan kung unsay motibo sa maong krimen.(Edwin Ian Melecio) (BANAT NEWS)
- Latest
