Kusug mopahibalo karong adlawa sa i-endorsar nilang mga kandidato

CEBU, Philippines - Ang politikanhong grupo nga Kugi Uswag Sugbo (Kusug) magpahigayon og convention karong udto aron mo-endosar og kandidato nga ilang suportahan para dinhi sa dakbayan.

Karong eleksyona wala na mopadagan og kaugalingong kandidato ang Kusug apan nahukman nila nga mosuporta sila sa mga kandidato nga matan-aw nila nga haum mangatungdanan.

Ang presidente sa Kusug nga si Atty. Raymond Garcia wala motug-an kun si kinsa ilang suportahan kay matud pa ibutyag nila kini atol sa convention karong udto anha sa Grand Convention Center.

Matud ni Garcia nga ang ilang i-endosar mga kandidato sa Bando Osmeña Pundok-Kauswagan (BOPK) ug sa kaatbang niini nga Team Rama.

Kasaligang tinubdan sa grupo nga Kusug mitug-an nga sila si Mayor Michael Rama ug Konsehal Edgardo Labella maoy ituboy sa Kusug sa pagkamayor ug bise mayor.

Ang mao gihapong tinubdan nibutyag usab nga sa pagka-kongresista sa south district ang ituboy sa Kusug mao si Atty. Aristotle Batuhan.

Wala hinuon motug-an ang tinubdan sa Banat News kun kinsa ang ilang ituboy kanila ni Raul del Mar ug Annabelle Rama pagka-kongresista sa north district.

Si Garcia wala mokompirmar sa maong impormasyon nga nahipos sa Banat News. Apan gitug-an ni Garcia nga tag-lima ra ka kandidato pagka-konsehal sa matag distrito ang ilang ituboy.

Ang ituboy nila sa pagka konsehal sa south district maglakip ni Cogon-Pardo barangay kapitan Eugenio “Jun” Gabuya nga karon alalay na sa BOPK.

Gipasabot ni Garcia nga si Jun Gabuya kauban nila sa Kusug sulod sa taud-taud nga katuigan ug karon na lang bag-o nahimo nga kaabin siya sa BOPK. Ang convention sa Kusug karong udto gipaabot nga tambongan sa gibana-bana 500 ka lider sa ilang kahugpongan sa lainlaing barangay.

Matud ni Garcia nga wala pa sila makahukom sa pagtuboy og kandidato pagka-senador. (BANAT NEWS)