Most outstanding tanod pasidunggan karong gabii

CEBU - Napili na ug pormal nang ipahibawo karong adlawa ang upat ka Most Outstanding Barangay Tanod sa dakbayan sa Sugbu.

Kini human sa duha ka buwan nga pagpahigayon sa “Search for The Most Outstanding Barangay Tanod of Cebu City.”

Ang maong kalihukan gipasiugdahan sa kagamhanan sa dakbayan uban sa pagpakig-alayon sa Rotary Club of Cebu-Guadalupe.

Matud ni Jessila Palacios sa Rotary Club nga maoy gisangunan sa nahisgutang indigay, nga dili sayon ang giagian nga screening sa mga barangay tanod.

Nagkanayon si Palacios nga tulo ka level ang giagian sa mga participants nga niapil sa search ug kini mao ang barangay level, district level ug city level.

Upat ang napili nga Most Outstanding Barangay Tanod, usa sa north upland, usa sa north lowland, usa sa south upland ug laing usa sa south lowland.

Sila makadawat og tag P19 mil ug trophy atol sa awarding nga gitakda karong alas 6:00 sa gabii diha sa Cebu City Legislative Building.

Sumala ni Palacios nga ilang hatagan usab karong gabii og special citation ang barangay tanod sa Lorega San Miguel nga si Mariano Calvario.

Ang nahisgutang tanod napusilan sa gituuhang tulisan dihang nikuyog sa kapulisan pagpahigayon og checkpoint pipila ka semana na ang nakalabay. (BANAT NEWS)