Wala pa magdeklara og State of Imminent Disaster–Tumulak
CEBU, Philippines — Giklaro ni Konsehal David “Dave” Tumulak nga ang resolusyon nga giaprobahan sa konseho nga nagtuki sa Akta Republika 12287 kun “Declaration of State of Imminent Disaster Act” wala nagpasabot nga adunay deklarasyon sa State of Imminent Disaster sa Dakbayan sa Sugbo.
Gihatagan kini og katin-awan ni Tumulak tungod kay ang unod sa iyang giduso ug naaprobaha’ng resolusyon mao ang pag-awhag sa kagamhanan nga mag-andam og igong lakang nga makalikay sa dakong epekto sa El Niño, lakip na ang pagsiguro sa suplay sa tubig, pagkaon ug tambal, bisan wala pa o wala pa magdeklara og State of Imminent Disaster.
Si Tumulak nagkanayon nga ang resolusyon mao ang usa ka panawagan kang Mayor Nestor Archival nga mandoan ang mga hingtungdang departamento sa kagamhanan ug mga nasudnong kagamhanan ug ahensiya nga magpatuman og mga preventive measures batok sa posibleng epekto sa grabeng El Niño. Matud ni Tumulak nga dili usab awtomatikong magpasabot og deklarasyon sa State of Imminent Disaster ang executive order nga giandam ni Archival tungod kay ang makahukom niini mao ang National Disaster Risk Reduction and Management Council (NDRRMC). Buot usab nga ipasiguro ni Tumulak nga adunay igong suplay ug barato gihapon ang mga palaliton sama sa mga tambal, medical supplies, pagkaon ug uban pa’ng batakang panginahanglan sa mga Sugboanon bisan pa sa paghuman sa huwaw. Sa laing bahin, gihangyo ni Konsehal Michelle Cellona ang Cebu City Human Resource Development Office (HRDO) nga susihon ang kasamtangang mga palisiya sa kagamhanan ug nirekomendar kini og flexible work arrangements alang sa mga empleyado sa siyudad panahon sa grabeng kainit sa panahon ug uban pa’ng katalagman. (BANAT NEWS)
- Latest















