^

Banat Balita

Polis nanukmag, gidakop

Kristine de Dios - Banat

CEBU, Philippines — Nag-atubang og kasong kriminal tungod sa slight physical injuries ang usa ka pulis nga naka-assign sa Mandaue City Police Office (MCPO) human giingong gisumbag niini ang usa ka 22-anyos nga motorista atol sa panaglalis nga may kalabotan sa trapiko sa Minglanilla, Cebu niadtong Nobyembre 12, 2026.

Gikumpirma ni MCPO chief Police Colonel Cirilo Acosta Jr. niadtong Huwebes, Nobyembre 19, nga ang 30-anyos nga police corporal naka-assign sa Mobile Patrol Unit sa ilang buhatan.

Matud ni Acosta, gipahibalo siya sa Minglanilla Police Station niadtong gabii sa Nobyembre 12 nga nalambigit sa usa ka gubot ang usa sa ilang mga personnel sa maong lungsod.

“On November 12, 2026, early evening, my attention was called by Minglanilla Police Station informing us that accordingly our personnel was involved in a commotion na nahitabo didto sa Minglanilla. So immediately gipada nato atong iyang commanding officer, at napamatud-an nato nga tinuod tawo gyud nato diay, member sa MCPO,” matud ni Acosta.

Padulong na unta sa iyang trabahoan ang pulis sa dihang nalambigit kini sa panaglalis sa trapiko diha sa National Highway sa Barangay Poblacion Ward II.

Nagsugod ang panaglalis human giakusahan ang pulis og reckless driving nga misangpot sa panumbag niini sa maong motorista.

Apan, naabot ang mga personnel sa Minglanilla Traffic Commission (MITCOM) ug gidakop ang pulis en flagrante delicto o naaktohan samtang gibuhat ang krimen.

Gidala ang duha ka partido sa Minglanilla Municipal Police Station alang sa imbestigasyon.

Lakip sa gisusi sa mga imbestigador ang closed-circuit television (CCTV) footage nga, sumala sa report, misuporta sa mga pahayag sa mga saksi nga ang pulis maoy unang nanumbag.

Nakaangkon og samad sa tuo nga apapangig ang biktima ug giingong nahiagom usab og emotional distress human sa insidente.

Gidala usab sa ospital ang duha ka partido alang sa medical examination.

Gikumpirma ni Acosta nga napasaka na ang criminal complaint for slight physical injuries batok sa pulis.

Kun mapamatud-an nga sad-an, posibleng mapriso ang pulis sulod sa 30 ka adlaw hangtod unom ka bulan, depende sa hukom sa korte ug sa silot nga ipahamtang ubos sa balaod. Gawas sa criminal complaint, nakig-alayon usab ang MCPO sa Minglanilla Police Station ug Cebu Provincial Police Office (CPPO) alang sa pagpasaka og administrative case for simple misconduct.

Matud ni Acosta, ang maong administratibong paglapas mahimong silotan og 10 hangtod 30 ka adlaw nga suspensiyon.

Human sa insidente, gibutang dayon ang pulis ubos sa Personnel Holding and Accounting Office (PHAO), samtang gikumpiska usab ang iyang service firearm isip kabahin sa internal procedures sa Philippine National Police (PNP).

Mipahinumdom si Acosta sa mga sakop nga wala gitugot sa kapulisan ang bisan unsang matang sa misconduct ug gikinahanglan nga magpabiling disiplinado ang ilang mga personnel bisan wala sa duty.

Subay sa direktiba ni Police Regional Office 7 director Police Brigadier General Rogelio Raymundo Jr. kinahanglang ang disiplina sa tanang kapulisan.

“Because this is where they put their trust. Ang police, maski naka-uniform o wala, off duty o dili, dapat magbantay sa among actions at all times,” matud ni Acosta.

Gibutyag usab ni Acosta nga lahi ang unang gisulti sa pulis ngadto sa iyang supervisor sa dihang gikontak kini aron pangutan-on kun asa na siya.

Matod ni Acosta, pinaagi sa tawag sa telepono, giingnan sa pulis ang iyang supervisor nga nalambigit siya sa usa ka vehicular traffic incident.

“But only to find out—another offense na naman ’yun, ’di ba? Namakak siya. Because he needs to be truthful in reporting to the commander himself,” matud ni Acosta.

Gikumpirma ni Acosta nga negatibo sa alkohol ang resulta sa liquor test nga gihimo sa pulis sa Minglanilla Police Station. (BANAT NEWS)

ARRESTED

  • Latest
Latest
Latest
abtest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

Get Updated:

Signup for the News Round now

FORGOT PASSWORD?
SIGN IN
or sign in with