Outstanding tanod '08 sa city ilusad

Ilusad na ugmang adlawa ang ikasiyam nga “Search for The Most Outstanding Barangay Tanod of Cebu City” nga pasiugdahan sa kagamhanan sa dakbayan uban sa pagpakig-alayon sa Rotary Club of Cebu-Guadalupe.

Usa ka parada ang ipahigayon ugma sa buntag nga manukad sa atubangang bahin sa Abellana National School paingon sa Plaza Sugbu o sa atubangang bahin sa Cebu City Hall.

Ang maong kalihukan gipaabot nga salmutan sa kapin sa usa ka libo ka mga barangay tanod gikan sa 80 ka mga barangay sa siyudad.

Matud ni Jessila Palacios sa Rotary Club nga maoy gisangunan sa nahisgutang indigay nga duha ka rason ang ilang tumong sa pagpahigayon sa search.

“To encourage our barangay tanod to keep up their good work in terms of peace and order and to give recognition sa ilang mga maayong buhat,” sumala ni Palacios.

Nagkanayon si Palacios nga tulo ka level ang agian sa mga tanod nga muapil sa search ug kini mao ang barangay level, district level ug city level.

Kadtong tanod nga modaug sa barangay level makadawat og P2 mil, plaque ug accident insurance gawas nga automatic nga mo-qualify sa district level.

Ang 20 ka mga tanod nga modaug sa district level makadawat usab og laing P2,500 ug maoy pilian alang sa upat ka “Most Outstanding Barangay Tanods of Cebu City 2008”.

“Upat atong pilion kay usa sa north upland ug north lowland ug laing duha ka tanod usab ang mudaug alang sa south upland ug south lowland,” dugang pasabot ni Palacios.

Ang palarang upat ka mga tanod nga modaug sa indigay makadawat og tag P15 mil ug kini ihatag atol sa awarding nga gitakda karong Disyembre 5.

Katapusang mipahigayon og search ang kagamhanan sa dakbayan alang sa most outstanding barangay tanod natigayon niadtong tuig 2006.

Ang midaog niadtong higayona mao sila si Danilo Dello sa barangay Tejero alang sa north lowland ug Renato Caballes sa barangay Busay alang sa north upland.

Samtang si Wilfredo Llamado Jr. maoy midaog sa barangay Mambaling sa south lowland ug Gregorio Arellano sa Kalunasan sa south upland.