Nagtukod og condominium sa Kalunasan gireklamo

CEBU, Philippines - Ang mga lumolupyo sa usa ka bahin sa Barangay Kalunasan, dakbayan sa Sugbo nireklamo batok sa usa ka kompaniya nga nagtukod og condominium project sa ilang lugar kay gamay kaayo ang gihatag kanila nga agianan.

Si Tessie Rosales, presidente sa usa ka kahugpongan sa mga lumolupyo sa lugar nga gitawag og “Back Cresanto” miingon nga dili sila supak sa pagtukod og condominium project apan ilang ihangyo nga hatagan sila og labing menus 1.5 ka metros nga agianan.

Matud ni Rosales nga usa ra ka metro ang gilapdon sa agianan nga gihatag kanilang mga lumolupyo ug ilang gihulagway nga delikado kini kun adunay sunog. Nasayran sa mga lumolupyo nga imbes sa Barangay Kalunasan magkuha og clearance ang contractor ug tag-iya sa condominium project, didto ang kompaniya mikuha og barangay clearance sa Lahug.

Si Kalunasan Barangay Kapitan Nunilon Monares miingon nga nagkaestorya na sila sa developer o kompaniya kabahin sa reklamo sa mga lumolupyo.

Nahibulong usab si Monares kun ngano nga sa Lahug man magkuha og clearance ang tagdumala sa kompaniya nga unta ang dapit kabahin pa man sa teritoryo sa Kalunasan.

Ang kapitan mipadala na og suwat ngadto sa Cebu City Legal Office aron mandoan ang developer sa proyekto nga ipahunong ang ilang trabaho samtang dili pa masulbad ang problema.

Gisuportahan sa kapitan nga ang mga lumolupyo angay gyud nga hatagan og igong gidak-on sa agianan paingon sa ilang nahimutangan. Si Rosales mipasangil nga kaniadtong Miyerkules adunay mga armadong tawo nga nangabot sa ilang dapit human masayod ang contractor ug tag-iya sa gitukod nga condominium project sa ilang reklamo.

Apan si Luke Carniga, ang operations chief sa Tactical Security Agency nga maoy nagbantay sa property, miingon nga 10 lang ka guwardya ang gipadala sa maong dapit aron magbantay sa luna ug sa mga empleyado.

Matud ni Carniga nga may pagtugot sila sa Comelec nga ang ilang mga guwardiya makadala og armas agi og pagtuman sa ilang trabaho. Ang dapit nila ni Rosales adunay mga 250 ka pamilya nga nagpuyo. (BANAT NEWS)