76ers inupuan ang No. 7 seed sa East playoffs

PHILADELPHIA — Kumolekta si Joel Embiid ng 23 points at 15 rebounds para banderahan ang 76ers sa 105-104 pagtakas sa Miami Heat sa play-in tournament.

Inangkin ng Philadelphia ang No. 7 seed at hahamunin ang second-seeded New York Knicks sa opening round ng Eastern Conference playoffs.

Nag-ambag si Nicolas Batum ng 20 points habang may 19 markers si Tyrese Maxey.

Sasagupain ng Miami ang Chicago Bulls sa agawan para sa No. 8 seed sa Eastern Conference playoffs kung saan ang mananalo ang lalaban sa No. 1 Boston Celtics sa first-round.

Bumangon ang 76ers mula sa isang 14-point deficit sa first half para agawin ang 96-94 bentahe sa likod ng three-point play ni Embiid bago nakatabla ang Heat sa 96-96.

Natawagan si Tyler Herro ng backcourt violation sa posesyon ng Miami na nagresulta sa 3-point play ni Kelly Oubre Jr. para sa 99-96 kalamangan ng Philadelphia.

Tumapos si Herro na may 25 points at may 19 mar­kers si Jimmy Butler.

Sa Chicago, humataw si guard Coby White ng career-high 42 points para banderahan ang Bulls sa 131-116 pagsibak sa Atlanta Hawks.