Dili managed

Dear Tito Miguel,

Maayong adlaw, ako diay si Jerome, taga Carcar City, Cebu .

Tulo ka tuig nami sa akong uyab nga si Sylvana nga grabe nako ka love. Buotan siya nako ug okay mi kung kami rang duha, apan naa ko’y usa ka dakong problema, murag dili siya komportable o dili siya ganahan makighalobilo sa akong pamilya. Sa higayon nga magkaabot sila sa pipila ka mga okasyon, dili kaayo managad.

Ako na siya gibadlong, apan wala gihapon siya mausab. Mao na ang rason nga wala gyud siya mauyoni sa akong pamilya.

Masakitan ko kay importante kaayo nako akong pamilya. Close kaayo mi, ug gusto unta nako nga magka-uyon silang tanan. Usahay ako na lang ang maulaw para niya. Igo ra siya motubag nga batasan na gyud niya nga dili hinagad maong dili daw siya angay but-an.

Naglibog ko kung unsaon nako pag-handle ani nga sitwasyon.

Unsay angayan nakong buhaton? Salamat kaayo. — Jerome

* * *

Jerome,

Dili siya hinagad sa tanan o sa imong pamilya lang? Kun dili siya hinagad sa tanan, mao gyud na iyang pagkatawo, snob. Lisod pugson kay natural niya, pero sa hinay hinay puwede niya makat-onan. Pero’g dili siya motubag, mopahiyom o motan-aw man lang sa tawo nga niuna’g tagad niya, dili lang siya snob, bastos pa. Pero’g mga dagkong tawo o datu iyang kasugat, mouna ba siya’g tagad, o kun maunhan siya’g tagad mobawos dayon siya? Kun mao, mamili siya’g tawo, samot nga dili maayo.

Kun sa imong pamilya lang siya dili managad, posible mauwaw siya o defensive ba kaha. Conscious siya unsa kaha ilang ikasulti, mahadlok basin mahukman dayon nga dili angayan para nimo. Kun mao, ipasalig kaniya nga gidawat siya sa imong pamilya. Pero’g padayon nga dili siya managad, basin mao pa na’y rason nga dili hinuon siya mauyonan. Pero’g mangatarungan nga ikaw man iyang uyab, dili imong pamilya, sakto man sab. Apan nagpaila lang siya unsa iyang batasan. Pakisama lang gud, kadiyot ra man tingali nga magtapok mo sa imong pamilya nga kuyog siya.

Kun lisod gyud niya ang makihalubilo sa imong pamilya, maski tarong nga pagtimbaya o panamilit ra iyang buhaton. Human sa hi ug hello, maminaw na lang gud siya sa istorya,ka’y basin sab wala siya’y ika-topic. Pero’g maski’g good morning o goodbye dili niya kaya buhaton, angay na ka magduha duha. Kun magdayon mo, magsige lang ka’g pasabot o depensa niya sa mga tawo nga matingala ngano ing ana siya. — Tito Miguel

Magpatambag ka? Ipada kang Tito Miguel: 0991-318-9366