Sunshine mapahiyomong mitubag sa isyu

CEBU, Philippines - Nabantayan nga wa gyud maapektohi si Sunshine Dizon sa mga negatibong balita batok kaniya sanglit confident kini sa dihang mitambong sa bag-ohay pa lang nga Star Awards for TV kung diin sa ikaupat nga higayon naangkon niya ang   Best Single Performance by an Actress sa pagdala niya sa Obra ( GMA-7).

Dungan niini, mitingog na ang aktres kabahin sa mga isyu batok kaniya diin usa na niini ang “buntis issue”.

“Mukha ba akong buntis?.Wala naman yatang nabubuntis ng dalawang buwan lang,” tubag pa sa aktres.

Dugang pa niya nga taga-tuig na lang siya ma-tsismis nga buntis busa dili na siya maapektohan niini.

“Taon-taon din, lahat ng gusto nilang sabihin, nasasabi nila, so, what’s important na lang siguro, as long as it’s not true, we shouldn’t mind it,” saysay pa ni Sunshine.

Gipadayag sa aktres nga nagkasakit siya hinungdan nga gitambagan siya nga kasamtangang mopahuway sa trabaho aron ma-relax ang iyang panglawas.

Giklaro usab niya nga wa siya nangluod sa iyang network, gani gitambagan pa siya sa GMA-7 Big Boss Atty. Felipe Gozon nga dili magpadala sa mga negatibong intriga.

* * *

Biyaheng Lupa lakwon karon

Human sa kalampusan sa Kimmy-Dora, usa na pud ka independent film ang bituonan ni Eugene Domingo, ang Biyaheng Lupa sa Quantum Films nga malantawan na sugod karong adlawa sa mga sinehan.

“Wala itong special effects. Halos magka-jet lag ako, ganu’n katagal, na mula alas singko ng madaling-araw hanggang umabot sa gabi. Diretso lang ang biyahe. At kung saan ka pinaupo, doon ka lang, di ka na makatayo,” tsika pa ni Eugene.

Mga bigatin ang nalakip sa Biyaheng Lupa , kini naglangkob nila ni   Coco Martin, Jacklyn Jose, Angel Aquino, Susan Africa, Allan Paule, Sharmaine Buencamino ug ubos kini sa direksiyon ni Armando “Bing” Lao. (Sanden J. Anadia)

Bong loyal gyud sa partido

Pormal na nga misang-at sa iyang certificate of candidacy (CoC) kagahapon si Sen. Ramon “Bong” Revilla Jr alang sa subli niya nga pagdagan isip senador sa 2010 election. Gihangop ni Bong ang ubang partido kay gihimo siya nga guest candidate pero iyang giklaro nga magpabilin gihapon siya sa Lakas-Kampi-CMD aron di siya matawag nga balimbing. 

Natsugi hinuon

Matud pa nga natangtang na sa iyang grupo si Crissa, ang female dancer nga miangkon nga napamabdosan ni Mark Herras. Gikatahong naguol og maayo si Crissa sa pagkatangtang sa iyang grupo ug mi-lenggua nga andam siya makig-atubang ni Mark.

Agaw-eksena si Mommy D

Gikagubtan pag-ayo si Manny Pacquiao sa iyang pag-file kagahapon sa iyang certiticate of candidacy alang sa pagka-kongresista sa Sarangani Province. Mas nahugyaw og maayo ang mga tawo sa presensiya sa iyang inahan nga si Mommy Dionisia nga way hunong sa paglamano sa iyang mga fans.

Bonggang album ni Eva

Hugyaw ang album sa Jukebox Diva   nga si Eva Eugenio kay napuno kini sa bonggang effects aron kagaton kini sa publiko. Usa sa unod sa maong album ang awit nga Tukso nga paborito niyang kantahon sa mga shows niya niadto.

New Moon mikusog og maayo

Kasamtangang nag-una sa US box office ang   Twilight saga: ‘New Moon’ nga gibidahan sa British actor nga si Robert Pattinson. Sa kasamtangang report, mikita na kini og $230.7 million sulod lang sa napulo ka adlaw ug gituohan nga modako pa ilabi na nga kasamtangan kini nga gipasalida sa mga sinehan.

Ne-yo Live in Manila

Gikatakdang mag-concert dinhi sa Pilipinas ang sikat nga American pop and R&B singer nga si Ne-Yo karong Enero 9 , 2010 sa SM Mall of Asia open ground . Pipila sa mga sikat nga kanta ni Ne-Yo naglangkob sa Mad , Closer , Miss Independent og uban pa.

MJ paborito sa Yahoo users

Ang kamatayon ni Michael Jackson maoy “most frequent online search requests” sa   search engine nga Yahoo sa tuig 2009. Nailog ni MJ ang korona ni Britney Spears nga upat na katuig nga naghupot sa maong titulo.

Charice: Wa ko ma-insecure oy

Giklaro ni Charice Pempengco nga wa siya masuya ni Rhap Salazar kinsa nakatungtong na pud og nagkadaiyang shows sa abroad sama sa “The Ellen DeGeneres Show”. Matud pa ni Charice nga nag-focus ra siya sa trabaho ug wa siya nakig-kompetinsiya sa ubang singers.             

Myrus patok sa Youtube

Mapasalamaton kaayo ang bag-ong singer nga si Myrus kay bisan bag-o pa siya sa industriya, mainiton siya nga gidawat sa publiko, gani ang awit niya nga “Sayang” kay napuno sa pagdayeg ilabi na sa Youtube online users.