2 holdaper bulagta sa shootout

BULACAN, Philippines - Dalawang kalalakihan na sinasabing notoryus na holdaper ang napatay sa kasagsagan ng buhos ng ulan matapos makipagbarilan sa mga ope­ratiba ng pulisya sa bahagi ng Barangay Bulihan, Malolos City, Bulacan kamakalawa ng gabi.

Walang makuhang ma­pagkakakilanlan sa dalawang napatay na nakasuot ng maong na puruntong, puting t-shirt at bullcap.

Sa police report na nakarating kay Bulacan PNP director P/Senior Supt. Fer­nando Mendez Jr., hinoldap ng dalawa ang gasolinahan sa bisinidad ng Barangay Guinhawa bago tumakas tangay nang di-nabatid na halaga.

Gayon pa man, naipa­abot naman ng ilang kawani ng gasolinahan ang insi­dente sa pulisya kaya inilatag ang follow-up operation.

Dito na namataan ang dalawang holdaper na nag­lalakad sa bahagi ng Capitol View Park kaya tinangkang sitahin ng pulisya subalit pinaputukan sila hanggang sa mauwi sa shootout.

Narekober ang dalawang cal. 38 revolver habang ina­alam pa ang pagkakakilanlan sa dalawang napatay.