3 rider utas sa salpok
MANILA, Philippines — Tatlong lalaki na sakay ng kanilang motorsiklo ang nasawi habang isa ang malubhang nasugatan sa magkahiwalay na trahedya sa kalsada sa Quezon City at Caloocan City.
Sa New Manila, Quezon City namatay sina Rolando Olarte, 34, at angkas nitong si Lovely Pesimo, 26, kapwa masahista nang masalpok sila ng kotse na minamaneho ni Kathleen Vanessa Asid, 36, dalaga, grab driver at nakatira sa Diamond Village, Novalichez, Quezon City.
Sa imbestigasyon, bago naganap ang aksidente dakong alas-10:30 ng gabi sa Doña Hemady Street., kanto ng 6th Street, New Manila ay pabalik na ang dalawang biktima sa kanilang opisina mula sa home service na noon ay madulas ang kalsada dahil sa umaambon.
Habang patawid sa 6th Street, ay sumulpot ang Toyota Vios na minamaneho ng suspek mula sa kaliwa nang masalpok sila.
Sa lakas ng pagkakabangga ay tumilapon sina Rolando at Lovely at bumagsak sa sementadong kalsada na kung saan namatay agad ang una habang ang huli ay idineklarang dead-on-arrival.
Sa Caloocan City ay namatay din ang rider na si Maurice Sayson habang ang angkas nitong si Ryan Acuña, 32 ay nasa kritikal na kondisyon nang salpukin sila ng isang kotse matapos ang umano’y ginawang paglabag sa trapiko nang mag-beating the red light kahapon ng alas-2:30 ng madaling araw sa kahabaan ng Boni Serrano Avenue patungo sa EDSA.
Hawak naman ng Caloocan City Police-Traffic Investigation Section ang nakabundol na si Percival Sevilla, 51, tsuper ng Toyota Vios (UVF-842), at residente ng Block 28B, Phase 3 Dagat-Dagatan Avenue, Caloocan na nagsabing hindi niya na magawang iwasan ang motorsiklo na hindi tumigil kahit nasa red light na kaya’t nasalpok ito.
- Latest