150K indibiduwal target bakunahan sa Quezon City
Sa 3-day National Vaccination Day
MANILA, Philippines — Target ng Quezon City government na makapagbakuna ng hanggang 150,000 indibiduwal laban sa COVID-19, sa idaraos na tatlong araw na National Vaccination Day simula ngayong araw, Nobyembre 29 hanggang Disyembre 1.
Nabatid na prayoridad ng city government ang lahat ng hindi pa bakunadong menor-de-edad na nagkakaedad ng 12-17 taong gulang at mga adult, gayundin ang pag-a-administer ng booster doses sa mga miyembro ng A1 (healthcare workers), A2 (senior citizens), at A3 (immunocompromised individuals) priority groups.
Kaugnay nito, inihayag si Quezon City Mayor Joy Belmonte na handang handa na sila sa naturang aktibidad.
“It’s all systems go for Quezon City. We have tapped groups for additional medical workers and partnered with malls and establishments to have more sites. We want to maximize the three days allocated for this vaccination drive,” ayon kay Belmonte.
Gagamitin aniya ng city hall ang kasalukuyan nitong suplay ng AstraZeneca vaccines na binili ng lungsod noong 2020. Sa 1.1 milyong doses ng AstraZeneca, nasa 229,000 doses na ang natanggap ng lungsod ng by batch.
“Good thing that we have procured this many vaccines for our QCitizens. While we wait for the supply provided for by the national government, we can use our own vaccines as booster shots,” paliwanag pa ni Belmonte.
Nabatid na maglalagay ang QC-LGU ng mga special sites sa mga malls gaya ng SM North Edsa Skydome, Eastwood City, Robinsons Magnolia, Waltermart North Edsa, SM Fairview, SM Novaliches, Fairview Terraces, Fisher Mall, at Crossroad Parkway Mall.
Magkakaroon din ng bakunahan sa SMART Araneta Coliseum at Elements sa Centris habang ang fast-food chain na Mcdonalds ay gagawing sites ang ilang sangay nito para sa pediatric vaccination.
Ang Philippine Medical Association (PMA) ay magbabakuna naman ng mga healthcare workers sa kanilang office auditorium habang ang QC Police District at QC Bureau of Fire Protection ay magpapadala ng mga karagdagang medical workers na itatalaga sa iba’t ibang vaccination sites.
- Latest
