Tumulak: Asa ang long-term waste management plan?

Nangayo ang konseho kang Cebu City Mayor Nestor Archival og long-term waste management plan kun diin ipasumite kini sulod lang sa 15 ka adlaw.

Gisaysay ni Konsehal Dave Tumulak nga wala pa gihapon masulbad nga krisis sa basura human sa nahitabong pagdahili sa basura sa Prime Integrated Waste Solutions Inc. niadtong Enero 8, 2026.

Hinungdan nga niduso si Tumulak og resolusyon nga naghangyo sa Executive Department nga gilangkuban sa Office of the Mayor, Department of Public Services (DPS), ug uban pang mga hingtungdang departamento nga maghimo ug mopresentar og konkreto, komprehensibo ug malungtaron plano aron makab-ot ang permanenteng solusyon sa basura sulod sa 15 ka adlaw gikan sa pagdawat sa maong mando sa konseho.

Matud pa ni Tumulak nga nagpabiling “unrevoked” ang gipatuman nga “State of Calamity” nga girekomendar sa Cebu City Disaster Risk Reduction and Management Council (CCDRRMC) niadtong Enero 13.

Sa pagkakaron, nagpabilin nga naglabay ang syudad sa Lungsod sa Aloguinsan kun diin dako ang gibubo sa kagamhanan alang sa padumala sa basura sulod sa walo na ka buwan.

Gibutyag ni Tumulak kinsa tsirman sa Committee on Budget and Finance nga lisod na og maligsan ang pundo alang sa ubang serbisyo sa kagamhanan kung mahurot na ang pundo nga gigahin alang sa pagdumala sa basura.

Bisan paman sa interim nga mga lakang aron dili mohunong ang pagpanghakot sa basura sa dakbayan, gihimug-atan ni Tumulak nga dili pwede nga magsalig ra kanunay sa temporaryo nga mga solusyon sama sa pagsalig sa landfill sa ubang lungsod.

Alang kang Tumulak, nagkinahanglan na ang syudad og usa ka malungtaron ug direktang tubag sa maong krisis. — /IBM (FREEMAN)