Nanginit nga Celtics milampaso sa Nets

CEBU, Philippines — Ang Boston Celtics mirehistro sa usa sa labing impresibo nilang kadaogan human ilang gikunis-kunis ang Brooklyn Nets sa iskor nga 136-86 sa NBA kagahapon didto sa TD Garden sa Boston, Massachusetts.

Si Derrick White mi-iskor og 27 samtang si Jayson Tatum midugang og 20 puntos alang sa Celtics, nga miposte sa ikalimang labing dako nga kadaogan sa kasaysayan sa ilang prangkisa sukad niadtong 1946.

Si Kristaps Porzingis mitali sa tanan niyang 15 puntos sa first half aron tabangan ang Celtics pagkadlit sa ikaunom nilang sagunson nga daog.

Ang Celtics, nga milampaso sa Indiana Pacers, 155-104, niadtong Nobiembre, nahimo nga ikatulo pa lamang nga NBA team sa kasaysayan nga midaog og dili mominus 50 puntos duha ka higayon sud sa usa ka season sunod sa Milwaukee Bucks niadtong 1978-79 ug Sacramento Kings niadtong 1992-93 season.

Nagmaya sab si coach Joe Mazzulla nga mikulit sa ika-100 niyang daog sa duha ka seasons niyang pagtimon sa Celtics, nga nagbitbit na karon og 43-12 rekord.

"It's something to be proud of, to be grateful for, just a testament to the people you have around you," matud pa ni Mazzulla.