Madridejos Knights mi-abante sa finals sa ACAPI chessfest
CEBU, Philippines — Ang Madridejos Knights Chess Club nga gipangulohan ni playing team owner Engr. Josito “Jojo” Clamor Dondon milampaso sa Las Piñas City-TFCC Chess Movers Club, 34-14, sa upat ka hugna nilang sangka sa semifinals aron pagtikang ngadto sa kampiyonato sa Senior division sa Association of Chess Amateurs of the Philippines, Inc. 1st President’s Cup online tournament.
Padayong nanginit human sa impresibo nilang salida sa eliminasyon ug dayon sa quarterfinals batok sa Valenzuela City White Knights Chess Club, ang No.1 seed nga Madridejos Knights sa isla sa Bantayan milampornas sa Las Piñas City-TFCC sa parehong iskor nga 12-0 sa nag-unang duha ka hugna.
Gisilyohan sa Madridejos Knights ang dalaygon nilang pagkastigo sa Las Piñas pinaagi sa 10-2 nga demolisyon sa ikatulong hugna.
Si Dondon, usa ka Arena International Master ug US Candidate Master nga toa nakabase sa Texas, nagdala sa bandila sa Madridejos Knights kauban sila si Engr. Gilbert Anthony Ababat, Antonio Cabibil, ug Joseleo Cortes.
Si Ababat tag-iya sa Fibertronics and Solartronics Inc. didto sa Southern California, si Cabibil kanhi Cebu Blitz King ug top board player sa DILG-7, samtang si Cortes kanhi varsity player sa University of San Jose-Recoletos (USJ-R) chess team.
Sa finals, ang Madridejos Knights makigharong sa Panabo Knights Chess Club sa Davao del Norte, nga mi-abante human gipalagpot ang Surigao Diamond Knights pinaagi sa sikit nga desisyon, 26-22, sa semis. Ang upat ka hugna nilang pagpinug-anay sa utok mosikad karong Biyernes, Mayo 3.
- Latest
