Ian Abne nagpanikad sa unang title fight Korona sa PBF ang tirada sa "Engkwentro 13"

CEBU, Philippines — Ang pangan ni Ian Paul Abne taud-taud nang anaa sa world rankings.

Apan ang way pildeng "Assassin" sa ARQ Stable wala pa makadaog bisan og usa ka titulo.

Mao kini ang nakahatag ni Abne og dugang kadasig sa dihang ang garbo sa Manticao, Misamis Oriental makighilam-osay og kump ni Darwin "Cool Boy" Boyones sa Biñan City, Laguna alang sa Philippine Boxing Federation (PBF) light flyweight belt sa gikahinaman nga "Engkwentro 13" fight card sa ARQ Sports Promotions karong Mayo 1 didto sa Mandaue City Cultural and Sports Complex.

"Una sa tanan, gusto nako nga magpasalamat sa akong manager nga si sir Jason Arquisola ug sa iyang wife nga amo promoter nga si mam Eva Arquisola sa paghatag nila nako og opportunity ingon man sa tanang sakop sa ARQ Boxing ug sa akong pamilya sa dako kaayo nilang suporta," matud pa ni Abne.

Bisan og wala pay bakus, ang 24-anyos nga si Abne magpasigarbuhon nga rated No.31 siya karon sa minimumweight division (105 lbs.) sa World Boxing Council (WBC). Karon nga ang oportunidad mitugdon sa iyang palad, si Abne misaad nga dili kini niya palabyon.

"Excited ko sa umaabot nakong away. Para nako, importante kaayo ni tungod kay dugay nako na-ranking sa world unya wala pakoy title nga gihawiran," dason pa ni Abne.

"Taud-taud sad ko nakapangandam aning duwaa. Akong ikapasalig nga nindot gyud ning awaya kay bagsik ug tested na sab ako kontra. Pero maningkamot ko ug buhaton tanan kutob sa akong mahimo aron makadaog og title para mapansin ko sa mga world champion," dugang pa sa manghud ni OPBF Silver flyweight champion April Jay "Astroboy" Abne.

Si Ian Abne nagkupot og perpektong 10-0-1 rekord uban ang 4KOs, samtang si Boyones nagbitbit og 6-4 nga baraha uban ang 3KOs.

Ang bugno nilang Abne ug Boyones nga gitakda sud sa 10 ka hugna kabahin sa makasaysayanong triple championship nga pasundayag sa ARQ. Sa main event, si Ramil "The Sharp" Macado, Jr. (8-0, 4KOs) makigbinukbukay ni PBF champion Lawrence "Shotgun" Dumam-ag (9-0-1, 6KOs) sa Zamboanga del Norte sa kulbahinam nga sangka tali sa mga way pildeng boksidor alang sa World Boxing Organization (WBO) Oriental flyweight title.

Sa supporting main event, si kanhi two-time world champion Vic "Vicious" Saludar (24-6, 14KOs) makigharong ni Sanchai Yotboon (14-7, 9KOs) sa Thailand alang sa korona sa WBO Oriental minimumweight division.