Lakers buhi pa, Thunder 3-0 na

CEBU, Philippines —  Ang Los Angeles Lakers naka-angkon pa og laing kinabuhi human gibaslan ang defending champion Denver Nuggets, 119-108, sa Game 4 sa ilang NBA Western Conference first-round playoff series kagahapon didto sa Cryto.com Arena.

Si LeBron James mibubo og 14 sa iyang 30 puntos sa katapusang kuwarter aron pagseguro nga ang Lakers dili na mahagba pag-usab human gisagunsonan og tulo ka pilde sa Nuggets.

Ang sidekick ni James nga si Anthony Davis midugang og 25 puntos ug 23 ka rebounds, samtang sila si Austin Reaves ug D'Angelo Russell mihipos og 21 puntos matag usa.

Bukid pa hinoon gihapon ang tungason sa Lakers gumikan kay wala pa may team nga nakabangon human malubong og 3-0 sa usa ka serye. Si Nikola Jokic mirehistro og triple-double nga 33 puntos, 14 ka rebounds, ug 14 ka assists apan nakawang ang iyang paningkamot sa habig sa Nuggets.

Si Michael Porter Jr. adunay 25 puntos ug 10 ka rebounds samtang si Jamal Murray mitimbre og 16 puntos sa pilderong kawsa.

Sa laing West seris, si Shai Gilgeous-Alexander mipupo og 24 puntos, lima ka rebounds, ug walo ka assists samtang sila si Jalen Williams ug Josh Giddey parehong mitali og 21 puntos sa dihang gibugha na sab sa Oklahoma City Thunder ang New Orleans Pelicans, 106-85, aron pagposte og 3-0 nga bentaha sa ilang serye.

Sa East, ang Boston Celtics mipabugnaw sa Miami Heat, 104-84, aron pagkontrola og balik sa ilang serye sa baraha nga 2-1, samtang ang Orlando Magic beat milampornas sa Cleveland Cavaliers, 112-89, aron tablahon ang ilang serye sa baraha nga 2-2.