Lomachenko mihimo kasaysayan

CEBU, Philippines — Subling gipamatud-an ni Vasyl Lomachenko nga siya ang numero unong boksidor karon sa kalibutan human niya gipaundang sa round 10 ang mas daku nga si Jorge Linares aron masakmit ang WBA lightweight title didto sa Madison Square Garden sa New York.

Si Lomachenko mihimo og kasaysayan isip boksingero nga nahimong third-division world champion sa ika-12 pa lang niyang professional fight.

Ang garbo sa Ukraine nasuwayan hinuon human siya mapatumba ni Linares sa sixth round, apan nakarekober aron mao na usab ang mukulata sa Venezuelan veteran.

Pag-abot sa 10th round, nakita nga mas mikusog si Lomachenko ug didto iyang gipasud ang usa ka hait nga uppercut sa gusok ni Linares kinsa nalup-og ug wala na kabarug pa dihang giiphan sa reperi.

"I prepared for the last few rounds, and my father told me, 'You need to go to the body,'" matud pa ni Lomachenko sa Associated Press.

Ang 30-anyos nga si Lomachenko misaka sa record nga 11-1, 9KOs, samtang si Linares nakatilaw sa ikaupat niyang pilde sa 48 ka sangka. (BANAT NEWS)