Nagmalampuson opening sa 1st Sunday.Com Basketball Club cagefest

CEBU, Philippines – Nagmalampuson ug puno sa kalipay ang opening sa 1st Sunday.Com Basketball Club cagefest niadtong Domingo sa buntag didto sa Mandaue City Cultural and Sports Complex.

Gitambongan kini ni Mandaue City Vice Mayor Glenn Bercede ug City Councilor Elston ‘Tony’ Dabon nga maoy pinasidunggang mamumulong ug ni Barangay Central councilor  Rodrigo ‘Butchok’ Bering ug ingon man sa mga opisyales sa  Sunday.Com Basketball Club ubos sa ilang presidente nga si Camelo ‘Tata’ Nadera.

Sa opening game, ang Astroboy milubong sa Minions, 56-43 sa pagpangulo ni Sheldon Gahi sa iyang 18 puntos. Ang unom ka sunod-sunod nga puntos ni Francisco Manatad  maoy mihaling sa dugang kainit  sa Astroboy, kinsa miabante og siyete puntos, 37-30 sa fourth quarter.  Si Jojo Carba nakatabang sab  sa rebounding sa Astroboy ug ingon man sa depensa.

Si Mark Joseph Palapo mao sab ang nangu sa Minions nga mitusak og 13 puntos. Sa laing aksiyon, midaog sab ang Alit’z batok sa Dota, 50-43. Gipangulohan kini ni Richie Malahos, kinsa mirehistro og 11 puntos.

Sila si Christian Cabahug ug Rufiel Palabay miiskor og nuybe puntos matag usa aron pangulohan ang napildeng Dota. Sulagma kaayo nga ang tanang team nga nagsul-ot og jersey nga kolor orange pulos midaog tungod kay ang Mustang nakaipsot sa Bulldog sa kulbahinam nilang duwa, 49-48.

Ang Mustang naglabaw og 18 puntos, 20-2 sa first period, apan nakugang sila dihang  gikalingawan og kitkit  sa Bulldog ang labaw ngadto na lang sa dos puntos, 48-46 human sa tira ni Diosdado Apa Jr. sa nahabiling 50 segundos sa duwa.

Napatabla ug posible pa untang mahatod ang duwa ngadto sa overtime dihang milabaw lang og tres puntos ang Mustang, apan si Frankie Antigua, kinsa gi-foul gikan sa three-arc misipyat sa ikatulo niyang free throw hinungdan sa ilang kapildihan.

Ang liga gipaluyohan sa Visayan Electric Company (VECO) ug International Pharmaceuticals Inc. (IPI) nga maoy major sponsors. Gisuportahan sab kini nilang  Vice Mayor Glenn Bercede, Hon. Elston Dabon, Hon. Butchok Bering, A.D. Gothong Manufacturing Corp., Cres Sayson, Editha Cortes, Juliet Balbona, Warly Capacite, Malou Claros, Junie Ouano ug Rico  Cabello.

Gawas ni Nadera, ang laing opisyales sa Sunday.com Basketball Club mao sila si Edward Pepito (vice president) ug Lorena Nadera (secretary).  Si Atty. Gonzalo ‘Sally’ Malig-on maoy club adviser. Ang mga duwa gidumala ni Tata Nadera uban nilang Corceno Baguio Jr., Boboy Zanoria ug Randy Barredo, ingon man nilang Ruchell Reyes ug Ian Armero. (BANAT NEWS)