UV lancers kampiyon sa toledo hoopla

CEBU, Philippines - Nagmangtas si Ferdinand Lusdoc kinsa maoy nagbaswat sa UV Green Lancers ngadto sa 110-93 nga kadaugan batok sa Carmen Copper Corp. (CCC) Builders aron modaug sa korona sa 3rd Mayor Rudy Espinoza Cup basketball tournament kaniadtong Sabado sa gabii didto sa Marcelo Barba Sports Complex sa Toledo City.

Gawas kang Lusdoc, misakmit og 19 puntos si Ronaldo Bucao ug pulos mikabkab og 14 puntos matag usa silang Ardy Larong, Mark Ababon ug Nigerian import Steve Cedrick Akomo.

Tungod sa maong kadaugan, mi-uli ang Lancers ni team owner Samsam Gullas ug ganting cash nga 100 thousand pesos.

Unom ka players sa Builders ang mibahug og double figures nga gipangulohan ni Jercules Tangkay sa iyang 18 puntos. Silang Ian Saladaga ug Mark Magsumbol parehong misakmit  og 13 puntos, si Jan Villaver may 12 puntos ug si Stephen Padilla may 11 puntos.

Sa sayo pa, naangkon sa University of San Carlos (USC) Warriors ang ikatulong pwesto human ilang gilubong ang MacMae Refilling Water sa iskor, 122-102.

Silang June Michael Cantonao ug Joven Cid Cortes miburak og  29 ug 28 puntos matag usa aron pangulohan ang Warriors samtang si Vincent Menguito maoy nangu sa MacMae sa iyang 22 puntos. Laing miamot og double figures mao silang Abe Galinato sa iyang 19 puntos ug silang  Alan Dimco ug JR Rabaya midugang og 16 ug 14 puntos matag usa.

Ang CCC Builder nakadawat og 70 mil pesos isip second placer, ang Warriors may 50 mil pesos ug ang MacMae may 30 mil pesos.

Ang maong torneyo gipaluyohan sab ni Toledo vice-mayor Arlene E. Zambo ug gidumala nilang commissioner Fr. Rolando Manayon, technical committee chairman George Alig ug tournament director Edwin Dejacto.

Puntos matag usa:

First Game:

USC (122)—Catonao 29, Cortes 28, Romaguera 15, Ortega 14, Guardiario 13, Que 13, Pepito 10.

MacMae (102)— Menguito 22, Galinato 19, Dimco 16, Rabaya 14, Magdadaro 12, Torion 11, Taghoy 9, Luga 9

Second Game:

UV (110)—Lusdoc 27, Bucao 19, Larong 14, Ababon 14, Akomo 14, Heruela 9, Harry 5, Ilubal 4, Williams 4

CCC (93)—Tangkay 18, Saladaga 13, Magsumbol 13, Villaver 12, Padilla 11, Cruz 10, Aying 7, Amores 5, Abatayo 4 (BANAT NEWS)