Guarte humakot ng 4 gold
MANILA, Philippines - Napagtagumpayan ni Mervin Guarte ng San Sebastian ang misyong hirangin bilang multiple gold medalists nang kunin ang pangunguna sa 1,500m at 5,000m run sa pagtatapos ng 87th NCAA athletics kahapon sa Rizal Memorial Track and Field Stadium.
Naorasan si Guarte ng 4:02.15 sa 1,500m run at 15:45.38 sa 5,000m event tungo sa ikatlo at ikaapat na gintong medalya matapos dominahin ang 3,000m steeplechase at 800m run.
Ngunit kinapos pa rin si Guarte, isang double silver medalists sa 26th SEA Games sa hangaring ibalik sa Baste ang overall title sa kompetisyon nang pumangalawa lamang sa mga nagsilahok tangan ang 591.66 puntos.
Ang nagdedepensang Jose Rizal University na hinawakan ng mga tinitingalang coaches sa athletics na sina Rosito Andaya, Jojo Posadas at Elma Muros-Posadas, ang siyang namayani uli nang makalikom ang inilabang manlalaro ng kabuuang 740 puntos.
Si John Albert Mantua ang siyang nagdala sa laban ng Heavy Bombers sa kanyang isang ginto at dalawang pilak.
Dahil dito, siya ang hinirang bilang Most Outstanding Athlete ng taon, isang award na ibinibigay sa atleta mula sa champion team na may pinakamagandang ipinakita.
“Ang ikalawang sunod na overall title ng JRU ay patunay sa hirap na ginawa ng mga atleta at coaches na nagpakahirap sa pagsasanay para bigyan ng karangalan ang paaralan. Ipinagmamalaki namin silang lahat,” wika ni Jose Supan na siyang kinatawan ng Heavy Bombers sa Management Committee (MANCOM).
Pumangatlo sa karera ang host University of Perpetual Help System Dalta sa naitalang 464.83 puntos habang ang Letran na host ng athletics sa taong ito ang pumang-apat sa 419 puntos.
Pinangunahan ang Knights ni national player Archand Christian Bagsit na inangkin ang ginto sa 200m at 400m run para maisantabi ang pagkatalo sa 100m dash.
- Latest
- Trending