As-Es Sportswear, Legends mag-ilog sa YUCBO title

CEBU, Philippines - Gitagak sa As-Es Sportswear ug sa Legends ang tagsa-tagsa nilang karibal aron maoy magsangka sa kampiyonato sa YUCBO basketball tournament didto sa Benjamin Solon Memorial gym sa barangay Cogon Central Ramos, ning siyudad.

Gipalagpot sa As-Es ang  lig-ong Radisson Blu Hotel pinaagi sa paglansang og 92-82 nga kadaugan ug aron usab langkaton ang katapusang lingkoranan sa finals.

Gipamatud-an na sab ni kanhi commercial cager Randy Roncal ang iyang kahawod dihang miantog kini og 27 puntos lakip na ang pito ka triples aron pangulohan ang As-Es Sportswear ni team owner ug Adlaon Brgy. Capt. Elvis Narra.

Ang kanhi CIT Wildcats nga si Ricardo 'Toytoy' Mendoza mipabuto sab og 27 puntos ug milangkat og 15 ka rebounds aron abagan ang kadaugan, samtang si Gerald Ylaya miambit og 10 puntos ug ang playing coach nga si Mark Anthony Galo mitabas og siyete puntos alang sa As-Es Sportswear.

Ang kanhi MisOr Meteors ug SIT stalwart nga si Mark Apepe miugkat og 25 puntos aron pangulohan ang Radisson Blu. Si Benjamin Quijada mitimbre og 16 puntos, samtang sila si Alvin Gubat ug Ian Nacorda nagkumboya og 24 puntos.

Sa laing bahin, ang Legends nakasulod sab sa finals human nila gilubong ang Youth Club, 76-65.

Gipangulohan ni Joel Bitog ang kadaugan pinaagi sa iyang 23 puntos, si Regino Potencioso misansan og 18 puntos.

Ang kanhi MVP nga si Rey Mario Edaño Jr. ug Arnel Barrita   mikandos og 14 puntos aron pangulohan ang Youth Club, samtang sila si Jeffrey Escober ug Peter Jacalan nagkumboya og 22 puntos.

Puntos Matag Usa

Unang duwa:

LEGENDS (76) - Bitog 23, Potencioso 18, Cheng 9, Cabalatude 7, Ong 5, Alvarez 5, Chua 2, Go 1

YOUTH CLUB (65) - Edaño 14, Barrita 14, Escober 12, Jacalan 10, Iso 7, Magallon 6, Ylaya 2

Ikaduhang duwa:

AS-ES SPORTSWEAR (92) - Roncal 27, Miñoza 27, Ylaya 10, Galo 7, Taladua 5, Sunsuna 5, Rubi 5, Sotelo 4, Millan 2, Pepito 1

RADISSON BLU (82) - Apepe 25, Quijada 16, Gubat 14, Nacorda 10, Go 8, Cabaluna 8, Neri 6, Taborada 4, Sy 4.  - BANAT NEWS