Summit amateur boxing sa Gaisano Countrymall

CEBU, Philippines - Masaksihan na usab ang mga umaabot nga amateur boxing prospects kinsa mopakita og aksiyon sa laing edisyon sa Summit Natural Drinking Water Amateur Series karong Domingo sa gabii didto sa Gaisano Countrymall carpark.

Ang Cabancalan nga maoy labing daghang boksidor, mopadala og lima ka entrante, duha gikan sa elementarya ug tulo sa sekondarya.

Mobanat usab ang mga boksidor gikan sa Flores Boxing Club ug Philippine-Australian Boxing Club nga adunay tag-upat, samtang ang Sanai ug University of the Visayas (UV) adunay tag-tulo ka boksidor ug duha gikan sa Mabolo National High School.

Mokompleto sa fight card mao ang mga boksidor gikan sa Talamban, Bacolod City ug Sultan Kudarat.

Tuyo ug tumong sa boxing tournament nga gipasiugdahan sa Summit Natural Drinking Water ug ALA Promotions mao ang pag-develop sa abilidad sa mga batan-ong boksidor.  (BANAT SPORTS)