GM Nasilowski miduaw ni SGM Cacoy Cañete

CEBU, Philippines - Ang bantugan nga eskrima Australian Grandmaster ug 10th Dan karate/jujitsu expert nga si Christopher Nasilowski, miduaw kang Supreme Grand Master (SGM) Ciriaco 'Cacoy' Cañete didto sa Doce Pares World Eskrima Federation headquarters sa dalan C. Padilla, siyudad sa Sugbu.

Uban ni Nasilowski nga miabot niadtong Martes mao ang tulo ka tinun-an gikan sa Australia nga si Master Mirek Osytek, Toly Lewin ug junior instructor Randell Rabic. Mag-ensayo sila uban sa mga tinun-an ni Cañete sulod sa usa ka semana.

Si Osytek usa ka martial arts expert nga adunay mga kagikan sa England ug Poland, samtang sila si Lewin ug Rabic parehong taga-Australia.

Dili lang kay maayo sa eskrima si Lewin, apan usa sab siya ka inilang musikero sa Australia.

Si Nasilowski natawo didto sa Prukoteka, Poland sa tuig 1951 apan mibalhin sa pagpuyo didto sa Australia.

Una siyang nagkat-on og martial arts sa tuig 1967 ug labang-labang kini sa nagkalain-laing dapit sa kalibotan aron sa pagpalambo sa eskrima.

Nagtukod siya og Millennium School of Martial Arts didto sa Adeliade sa habagatang bahin sa Australia ug misanga kini didto sa Poland ug Slovakia.

Laing matang sa martial arts ang gitun-an ni Nasilowski mao ang shotokan karate, boxing ug taekwondo. Apan mas paborito niya ang taekwondo nga iyang unang nakat-onan sa pagbalhin niya didto sa Australia gikan sa iyang yutang natawhan sa Poland.

Nagsugod siya’g train didto sa Rhee Taekwondo Academy sa Adelaide sa tuig 1972 sa edad 21 anyos.