Farm Fresh nakawala sa PLDT

MANILA, Philippines — Tinapos ng Farm Fresh ang three-game winning streak ng PLDT matapos itakas ang 20-25, 25-17, 23-25, 25-20, 17-15 panalo sa 2026 Premier Volleyball League (PVL) All-Filipino Conference Siklab Series kahapon sa Smart Araneta Coliseum.

Nagpasabog si Trisha Tubu ng game-high 30 points, habang may 14, 12 at 11 markers sina Royse Tubino, Mylene Paat-Reza­nova at Ces Molina, ayon sa pagkakasunod.

Ang back-to-back wins ng Foxies ang nagtaas sa kanilang baraha sa 4-2 para solohin ang third spot at palakasin ang tsansa sa semifinals.

Nagtala si Fil-Am setter Alohi Robins-Hardy ng 23 excellent sets para sa kanilang opensa at nag­lista si libero Maicah Larroza ng 21 excellent receptions para sa tropa ni Japanese mentor Koji Tsuzurabara.

“We became better after every fifth-setter we played in. The performance, skills, and the mental aspect all improved. Everyone had a good performance,” ani Tsuzurabara.

Nagbalik sa bench si coach Rald Ricafort matapos mawala sa tatlong sunod na laro ng High Speed Hitters na nahulog sa 3-3 marka katabla ang Akari Chargers at Choco Mucho Flying Titans sa fourth place.

Binanderahan ni Fil-Canadian Savi Davison ang PLDT sa kanyang triple-double na 23 points, 23 excellent digs at 19 excellent receptions, habang may 13 markers si Jovelyn Prado.

Humirit ng fifth set ang Foxies matapos agawin ang 25-20 panalo sa fourth frame sa likod nina Tubu, Paat-Rezanova at Molina.

Si Tubu ang nagba­ngon sa Foxies mula sa 10-13 pagkakaiwan sa fifth set para sa kanilang 14-13 match point bago itinabla ni Kim Kianna Dy ang High Speed Hitters sa 14-14.

Nagpalitan ng puntos sina Tubu at Davison para muling magtabla ang dalawang koponan sa 15-15.

Ang magkasunod na atake nina Tubu at Tubino ang tuluyan nang sumelyo sa panalo ng Farm Fresh kontra sa PLDT.