Liga sa Daanbantayan sugdan na karong adlawa

CEBU, Philippines - Sugdan na karong adlawa ang gikahinaman nga Mayor’s Cup 2011 didto sa lungsod sa Daanbantayan.

Ang kalihukan sugdan sa usa ka parada libot sa maong lungsod nga salmotan sa mga magduduwa ug sa mga opisyal sa lungsod ug sa mga barangay.

Ang mga magduduwa magagikan sa walo ka pangpubliko ug pito ka pribadong secondary schools, 10 ka mga patigayon ug 18 sa 20 ka barangay ang mosalmot sa liga sa basketbol.

Duha ka barangay ang nahimutang sa isla nga mao ang barangay Logon (Malapascua Island) ug Carnaza ang wala moapil sa liga ning tuiga.

Si Mayor Maria Luisa Loot gipaabot nga mopabati sa iyang mensahe ngadto sa mga magduduwa, samtang ang anak niini nga si Bokal Sun Shimura, ang sports committee chairman, ang modeklarar sa pormal nga pagbukas sa liga.

Molamas sa kalihukan mao ang pagpili og "Miss Mayor’s Cup 2011."

Ang liga kabahin sa mga kalihukan sa kapistahan sa Santa Rosa de Lima, ang mahal nga patrona sa lungsod sa Daanbantayan karong Agosto 29 ug 30.  (BANATSPORTS)