One Thousand Cranes Run gitakda

CEBU, Philippines - Mopasiugda na sab og laing lumba ang ThreeSixty Pharmacy nga ulohan og "One Thousand Cranes Run" alang sa mga nabiktima sa kalamidad didto sa Japan karong Mayo 22 diha sa Asiatown I.T Park.

Human sa malampuson nilang night race niadtong Abril 9, ang mga organizers sa lumba laraw nga makahatag og kadasig ngadto sa mga Hapon pinaagi sa paghalad sa maong lumba.

Gawas sa kompetisyon, ang mga runners may kahigayonan usab nga mohimo og mga origami human sa lumba isip halad ngadto sa nasud sa Japan.

"Whatever fund raised out of this, it will be included for the donation to the Japan Red Cross," matud pa ni Ramon Carlo Yap, business development officer sa ThreeSixty Pharmacy atol sa press conference kagahapon didto sa Café Laguna sa Ayala Terraces.

Ang lumba adunay lima ka kategoriya, kini mao ang 15K, 6K, 3K ug kiddie run ug gibahin sa 100m ug 200m dash.

Ang mga top finishers sa matag dibisyon makadawat og cash prizes, freebies ug certificate gikan sa mga sponsors.

Niadtong interesadong mosalmot, ang registration fee nagkantidad og P500 alang sa 15K, 6K ug 3K, samtang P450 sa kiddie run. Sa maong mga registration fees, ang entrante makadawat og limited edition race jersey, trail run bag, snacks ug accident insurance nga nagkantidad og P50,000. Mamahimong magparehistro didto sa RUNNR sa Ayala Active Zone ug sa tanang sangang tindahan sa ThreeSixty Pharmacy.   - BANAT NEWS