Villanueva bag-ong boksidor sa ALA

CEBU, Philippines - Ang 22-anyos nga si Arthur “El Matador” Villanueva mao ang labing bag-ong adisyon sa mga umaabot nga world title prospect sa ALA Promotions human sa malampuson niining sangka sa Pinoy Pride 5: Battle of Champions niadtong miaging Sabado didto sa La Salle Coliseum sa Bacolod City.

Si Villanueva (16-0, 11KOs) mao ang kasamtangang Philippine flyweight champion ug misaka na ngadto sa super flyweight division diin midaog siya batok sa beteranong si Mark Anthony Geraldo pinaagi sa six round technical decision.

Ang manager ni Villanueva nga si Henry Guanzon nagkanayon nga daku ang potensiyal nga iyang nakita sa batan-ong boksidor ug wa siya'y duda nga mosikat kini isip usa sa mga maayung boksidor sa nasud.

Ang lumad nga taga-Bacolod nga si Villanueva giplanohang mag-train didto sa ALA Boxing Gym diin makahigayun siya pakig-sparring sa iyang mga idolo nga sila si Milan Melindo ug AJ Banal.

Simpolang, Vikings pulos naka-ipsot

Parehong mikulit og dos puntos nga kadaugan ang Simpolang Barbecue Haus ug ang Viking Haulers batok sa tagsa-tagsa nila nga kaatbang sa 3rd F. Llamas Youth Association (FYA) basketball tournament didto sa sitio Manggahan open court sa barangay Punta Princesa, ning dakbayan.

Ang defending champion nga Simpolang midaog batok sa OMKI Megavolts, 72-70 pinaagi sa free throws, samtang mao sab ang Vikings dihang ilang gipukan ang CRV, 73-71 tungod sab sa upat ka free throws.

Si Ryan Villaver maoy nangu sa Simpolang sa iyang 19 puntos, gisundan ni ex-USJR Jaguar   Giovanni Canceko nga adunay 16 puntos. 

Ang free throws ni Ulysses Tabar ug ang lay-up maoy nakapadaog sa Simpolang, kinsa naghupot karon og 3-5 nga baraha, samtang ang Megavolts nga adunay 2-4 nga baraha gipangulohan ni Berto Codilla sa iyang 15 puntos.

Sa laing bahin, si Dondon Cadungog mi-iskor og 18 puntos alang sa Vikings, apan ang upat ka sagunson nga free throws ni Jorge Canceko maoy mibaswat alang sa ilang kadaugan.

Ang tandem nilang Dexter Caballero ug Ranel Patalita maoy nangu sa CRV nga nagkumboya og 41 puntos.

PUNTOS MATAG USA

Unang duwa:

                Simpolang (72) - Villaver 19, G. Caneko 16, Medalle 11, Tabar 11, Laurente 11, Abella 4, J. Canceko 2.

                OMKI (70) - Codilla 16, Tabares 15, Jorbita 15, Jakosalem 9, Atillo 6, Gemperoa 3, Palo 2, Martinez 2, Rabi 2

Ikaduhang duwa:

                Vikings (73) - Cadungog 18, Baldago 10, Baslo 9, Canceko 8, Sydiongco 8, Avila 7, Pacaña 4, Cal 4, Lañojan 2

                CRV (71) - Caballero 21, Patalita 20, Estella 12, Torrelisa 5, Dacayana 4, Garcia 4, Caballes 2, Cañete 2 (BANAT NEWS)