Texters martsa sa semis

CEBU, Philippines - Mimartsa ngadto sa semifinal round ang top seeded Talk N' Text Tropang Texters dihang ilang gidemolis ang Rain or Shine Elasto Painters, 107-92, sa quarterfinals sa PBA Philippine Cup kagabii didto sa Araneta Coliseum.

Ang Texters nga nagbatun og twice-to-beat advantage yanu kaayung mikusokuso sa Painters nga wala gyud makatilaw sa labaw sulod sa upat ka kuwarter sa duwa.

Grabeng nakapatuyang sa ilang opensa ang Texters kinsa mikulit dayun og 13 puntos nga labaw sa halftime, 60-47, sa pagpangulo ni Jared Dillinger kinsa miposa og 18 sa iyang kinatibuk-ang 20 puntos sa first half.

Gawas sa init nga opensiba sa Texters gidunganan usab kini nila og hugot nga depensa sa pagpangulo nila ni Dillinger, Kelly Williams ug Jason Castro aron mapugos ang Painters sa paghimo og mga turn-overs.

Miburot ang labaw ngadto sa 23 puntos, 87-64, sa nahibiling 1:13 sa mga fast break plays nila ni Williams ug Alapag og gikan didto wala na lingia pa sa Texters ang Painters nga gipangulohan ni Sol Mercado kinsa miiskor og 16 puntos.

Sa maong kadaugan ang Texters magpaabot nalang karon sa resulta sa "best-of-three" semifinals series tali sa Meralco Bolts ug Derby Ace Llamados.