IgiMax ikalima sa Busay Mountain Road Race

CEBU, Philippines - Mihakot na usab og laing titulo si 3-time junior Phil Premier Cycling League champion Luis Miguel 'Igi' Maximo human mipahiluna sa ikalimang dapit sa men's open category C sa Cebu Cycling Busay Road Race didto sa Busay Hills, ning siyudad.

Kini nagpakita og dakung kalamboan sa batan-ong cycling sensation sa Sugbu tungod kay human mipuwesto sa ika-15 nga dapit sa miaging Greenhouse Road Race didto gihapon sa Busay, milayat siya ngadto sa ikalima nagsunod sa mga beteranong cyclists nga sila si Toto Lim, Raffy Bacayo, Raymond Naquines ug Ryan Canada.

Sa category B, ang Italyanong si Mirco Valentine maoy misakmit sa kampiyonato, gisundan nila ni Amon Espinosa, Jonas Ponseca, Dadong Carcueva ug Ome Rodriguez nga maoy mikompleto sa top five finishers.

Ang trio nilang Espinosa, Carcueva ug John Christopher Gaspar mao ang misakmit sa kampiyonato sa Team C category, samtang sila si Bacayo, Naquines ug Canada maoy kampiyon sa Team B class.

Impresibo usab ang debut sa bag-ong cycling team nga Springdale School Junior Cycling Team nila ni Igimax ug iyang classmate nga si Johann Reyes human sila milampos pagtapos sa lumba sa team category. – BANAT NEWS